Upplýsingar um þjóðaratkvæðagreiðslu um áframhald aðildarviðræðna við ESB

Frú forseti. Á sameiginlegum fundi utanríkismálanefndar og stjórnskipunar- og eftirlitsnefndar Alþingis með fulltrúum Feneyjanefndarinnar í morgun var af hálfu gestanna lögð mikil áhersla á að spurning í væntanlegri þjóðaratkvæðagreiðslu um aðild að Evrópusambandinu eða viðræður við Evrópusambandið væri skiljanleg öllum og allir skildu hana á sama hátt. En það var ekki síður lögð áhersla á að það væri á hreinu hvað tæki við ef atkvæði yrðu greidd með tillögunni eða meiri hluti fengist til að fallast á tillöguna. Þar vantar töluvert upp á. Fulltrúar Feneyjanefndarinnar bentu á að það gæti verið ráð að leita til Evrópusambandsins og fá svör frá því um það hvaða ferli taki við, hvernig verði brugðist við og hvað þurfi að gerast til að viðræður haldi áfram og með hvaða hætti þær viðræður verði. Ég nefni þetta hér, frú forseti, því að í mánuð hafa fulltrúar minni hlutans í utanríkismálanefnd beðið um að leitað yrði svara hjá Evrópusambandinu við nokkrum spurningum. Við því hefur enn ekki orðið. Við gerum enga kröfu um að þetta verði gert í krafti þingskapa, við gerum einfaldlega þá kröfu að utanríkismálanefnd Alþingis afli þeirra gagna sem nauðsynleg eru í þessu máli eins og utanríkismálanefnd hefur gert í stórum utanríkismálum í meira en öld eða þingið ella.

Frú forseti. Bara til að hnykkja á því í ljósi þess sem hér hefur komið fram: Á sameiginlegum fundi stjórnskipunar- og eftirlitsnefndar og utanríkismálanefndar í morgun með fulltrúum Feneyjanefndarinnar nóteraði ég hjá mér þessi ummæli sem hv. þm. Sigmundur Davíð Gunnlaugsson er að vitna til. Í svari við spurningu kom fram að það væri kannski ráð að sækja einmitt þessar upplýsingar því það vissi enginn hvað tæki við. Það væri kannski eðlilegt í ljósi þess að óska eftir einhverju samtali eða frekari upplýsingum um málið. Hér er eingöngu verið að vitna í það sem sannarlega kom fram á fundinum. Fyrir mitt leyti þykir mér eðlilegt, frú forseti, að það verði tekið við þessum leiðbeiningum því þetta eru ekki einhverjir aðilar úti í bæ, þetta er bara stofnun á vegum Evrópusambandsins og fulltrúar hennar sem þarna eru að tjá sig. Ég held að þessar ráðleggingar hljóti að hafa talsvert mikið vægi.

Frú forseti. Það sem hv. þm. Pawel Bartoszek nefnir hér og ég hefði kannski átt að nefna er að við höfum einnig gert athugasemdir við það, gerðum það á fundi í dag, að eftir þessa mánaðarbið skuli hv. formaður nefndarinnar koma með tillögu sem hann kallar breytingartillögu en er bara tillaga um eitthvað allt annað. Við erum að biðja um upplýsingar frá Evrópusambandinu og það er í krafti þingskapalaga. Utanríkismálanefnd Alþingis getur einfaldlega sent beiðni á Evrópusambandið og spurt: Hafið þið kannski heyrt af því að hér er verið að ræða hugsanlegt aðildarferli Íslands að Evrópusambandinu? Gætuð þið upplýst okkur um hvað taki við fari fram svona þjóðaratkvæðagreiðsla? Hvers vegna skyldum við ekki gera það? Utanríkismálanefnd Alþingis hefur frá upphafi leitað eftir upplýsingum þar sem þær er að fá og frá þeim aðilum sem við á hverju sinni.