Áframhald aðildarviðræðna við ESB

Frú forseti. Nú liggur ljóst fyrir með þeirri frétt sem birtist í Morgunblaðinu í morgun að hæstv. ráðherra, forystumenn ríkisstjórnarinnar, hafa annaðhvort viljandi eða óviljandi sagt þinginu og þjóðinni ósatt um aðildarviðræður við Evrópusambandið og áform um þjóðaratkvæðagreiðslu þar um. Það liggur nú ljóst fyrir að takist að endurvekja viðræðurnar þá þarf að gera það á þeim forsendum sem lagt var upp með og Evrópusambandið sjálft gerði grein fyrir því, lagði línurnar. Þar kemur skýrt fram að þessar viðræður muni ekki snúast um að sjá hvað er í boði. Áframhald viðræðna myndi eingöngu snúast um áframhaldandi aðlögun að Evrópusambandinu og umfangsmikla aðlögun. Með öðrum orðum, frú forseti, málið er hér fram komið á fölskum forsendum og við getum ekki rætt það hér áfram á þeim forsendum sem lagt var upp með. Jafnframt hlýt ég að leggja fram beiðni til hæstv. forseta um að gefið verði svigrúm í dagskrá þingsins fyrir sveitarstjórnarkosningahlé til að ræða þetta mál sérstaklega.

Frú forseti. Ég get ekki annað en tekið undir orð hv. þm. Sigmundar Davíðs Gunnlaugssonar, formanns Miðflokksins, varðandi það að forseti skapi svigrúm á dagskrá þingsins sem allra fyrst til að hægt sé að ræða þetta, því að þau gögn sem nú hafa fundist og virðast, eins og hér er lýst á forsíðu Morgunblaðsins, hafa verið grafin einhvers staðar þar sem erfitt var að komast að þeim á heimasíðu utanríkisráðuneytisins og hvergi nefnd í tengslum við gögn sem eru lögð fram er varða þingmálið sem nú er til umfjöllunar í þinginu. Það er algerlega ótrúlegt. Sú mynd teiknast upp núna alveg skýr að þeir sem töldu málarekstur ríkisstjórnarinnar vera borinn áfram af blekkingum — það blasir við að sú tilfinning var rétt. Þarf ekki að kíkja í neinn pakka. Hann er galopinn og í honum er Evrópusambandið eins og það er. Þetta er bara leitt út með mjög skýrum texta sem utanríkisráðuneytið sjálft þýddi og birti á sínum tíma en ákvað síðan að gera ekki mikið með eða að lyfta í öllu falli ekki þegar þurfti að blekkja þjóðina til fylgilags nú um stundir.

Virðulegur forseti. Ég tek undir óskina um umræðu í þinginu, hvort sem það verður í skýrsluformi eða öðru. En utanríkisráðherra verður að gera hreint fyrir sínum dyrum.

Frú forseti. Eins og komið hefur fram undir þessum lið þá liggur fyrir að í gögnum utanríkisráðuneytisins sjálfs koma fram upplýsingar sem staðfesta það sem margir í þessum sal hafa haldið fram, þ.e. að umræðunni og þessu ferli í aðdraganda þessarar boðuðu atkvæðagreiðslu er ekki fylgt eftir með réttum upplýsingum. Þetta kemur fram frá utanríkisráðuneytinu sjálfu. Það sem meira er þá kemur fram, af því að hér var nefnd þessi grein í Morgunblaðinu, forsíðugrein þess, þar kemur m.a. fram, af því að hér hefur mikið verið rætt um erlend afskipti af þessari þjóðaratkvæðagreiðslu og ótta við hana, að ESB muni beita sér til að tryggja stuðning borgaranna við aðildarferlið. Þannig að ég tek undir þær óskir sem hér hafa komið fram. Það verður að gefa svigrúm, frú forseti, til að taka þetta fyrir, skoða þessi gögn, því ef rétt reynist allt sem fram kemur í þessari forsíðufrétt Morgunblaðsins er alveg ljóst að hér er farið fram á fölskum forsendum.

Frú forseti. Hv. þingflokksformanni Viðreisnar, Sigmari Guðmundssyni, þótti ósanngjarnt að hér væri notað orðið blekkingar í tengslum við framgöngu ríkisstjórnarinnar á framsetningu hennar á málinu öllu. Hér eru bara einfaldlega 15 blaðsíður sem utanríkisráðuneytið þýddi á sínum tíma og birti, eftir á að hyggja þannig að lítið bar á á heimasíðu sinni en er nú flotið upp, þar sem Evrópusambandið rammar inn ferlið. Og það er ekki verið að kíkja í neinn pakka samkvæmt þessu uppleggi, heldur er aðlögun í gangi samfellt á samningstímanum. Þess vegna hefur seinni atkvæðagreiðslan sem hv. þingflokksformaður Viðreisnar vísar til ekkert gildi sem öryggisventill ef í gegnum allan tímaferilinn hefur verið unnið samfellt að aðlögun eins og hér er listað upp. Það er hreinlega alveg ótrúlegt með hvaða hætti málið hefur verið kynnt hér fyrir þinginu og þjóðinni hvað það varðar að menn ætli bara að sjá til hvort standi til boða. Það er ekki verkefnið sem er fram undan klaufist menn til að segja já í ágúst, bara alls ekki.

Frú forseti. Hv. þm. María Rut Kristinsdóttir kemur í pontu og talar um undir liðnum fundarstjórn forseta að hér sé um fyrirsjáanlegt upphlaup eða gagnrýni að ræða, en ég sé mig knúinn til að leiðrétta hv. þingmann því það er nákvæmlega ekkert fyrirsjáanlegt við þetta sem nú er að eiga sér stað. Það var einfaldlega að fljóta upp það sem líklega stóð til að halda eins djúpt niðri og hægt var, staðfesting og upplýsingar frá utanríkisráðuneytinu sjálfu um að hér sé ekki um neitt að semja. Hér er ekki neinn pakki til að kíkja í undir þeirri hugmyndafræði að hann sé með einhverju móti lokaður og þurfi að opna til að fá að gægjast inn. Það liggur algjörlega ljóst fyrir, og er staðfest í gögnum utanríkisráðuneytisins, hvað er í þessum pakka. Þess vegna þykir mér eðlilegt að málið héðan í frá í umræðunni, bæði í þessum sal og úti í samfélaginu, sé rætt á þeim forsendum en ekki á einhverjum forsendum þess að við séum að fara í samtal við Evrópusambandið til að sækja einhverja sérstaka samninga fyrir Ísland. Það er algjörlega staðfest í gögnum utanríkisráðuneytisins hvað er í boði og það er að aðlagast regluverki Evrópusambandsins.

Frú forseti. Ég tek undir með þeim sem hér voru að tala um þessa vafasömu spurningu sem lögð verður fram fyrir þjóðina í ágúst og menn ætla að það sé enginn vafi á því að við erum að fara að aðlaga okkur að Evrópusambandinu strax og við setjumst við þetta samningaborð. Menn tala um blekkingar, blekkingarnar eru auðvitað alfarið stjórnarinnar að fara þannig í málið eins og ætlunin er. Það er einfaldlega: Annaðhvort erum við að fara að sækja um aðild að Evrópusambandinu eða ekki. Það er bara svo einfalt. Hvað varðar orð hv. þm. Dags B. Eggertssonar um að staða Íslands væri sterkari nú, það má vel vera. En hverjum treystum við? Þó að staðan sé sterk, treystum við Viðreisn til að leiða þessar viðræður? Treystum við virkilega Viðreisn til að leiða þessar viðræður? Nú nýverið var Viðreisn að ljúka samningum um makrílveiðar Íslendinga. Hvað gerðist þar? Hagsmunum Íslands var varpað fyrir róða í þeim samningum. Treystum við Viðreisn til að leiða þessar samningaviðræður? Nei.

Frú forseti. Meiri hlutinn hér kann augljóslega ekki að skammast sín. Fólkið sem stöðugt lýsir áhyggjum af upplýsingaóreiðu tekur hér upp á hinum ýmsu furðubrögðum til að drepa málum á dreif þegar staðreyndirnar liggja fyrir og það frá Evrópusambandinu sjálfu, þýtt af utanríkisráðuneyti Íslands. Menn gera sér upp fávísi, þykjast ekkert skilja og svo þessi furðulega brella sem hv. þm. Sigmar Guðmundsson endurvakti hér, að halda því fram að „okkur finnst þetta“ og „þið segið þetta“, þó að þau séu að halda fram tómri dellu og við séum að benda á staðreyndir, en af því að það eru ólíkar skoðanir þá bara verðum við að fara í þjóðaratkvæðagreiðslu til að vita hver hefur rétt fyrir sér. Þetta er ekki boðlegur málflutningur á Alþingi, frú forseti. Ég tek undir athugasemd hv. þm. Guðlaugs Þórs Þórðarsonar hér áðan. Mér finnst alveg tilefni til þess að forseti minni þingmenn á það hvernig eigi að bera sig að hér og leyfi þeim ekki að komast upp með að tala í tvær mínútur um einhverja tóma þvælu eins og eftirlátið var hv. þingflokksformanni Viðreisnar.