Afstaða ráðherra í þjóðaratkvæðagreiðslu

Virðulegur forseti. Já, ég er á svipuðum slóðum og hv. þingmaður sem var hér á undan mér. Ríkisstjórnin er svo sannarlega búin að setja ESB-aðild á dagskrá. Flokkur fólksins hefur ítrekað lagt fram þingsályktunartillögu og talað fyrir því hér á þinginu allt frá árinu 2019 að umsókn Íslands um aðild að Evrópusambandinu verði dregin til baka. Hæstv. barna- og menntamálaráðherra og formaður Flokks fólksins hefur raunar sagt að engin ástæða sé til þess að Ísland kasti sér lengra í fangið á Evrópusambandinu en hún situr nú í ríkisstjórn sem hyggst hefja aðildarviðræður við ESB á ný. Kannski hefur Flokkur fólksins samþykkt þennan könnunarleiðangur til að halda ríkisstjórnarsamstarfinu saman en afstaða flokksins hefur lengi legið fyrir. Flokkurinn er ekki hallur undir aðild að ESB og ég þakka hæstv. ráðherra fyrir að vera skýr hér áðan í því að það virðist enn vera afstaðan. Hv. þm. Guðmundur Ingi Kristinsson orðaði það svo í ræðustól eitt sinn, með leyfi forseta:

„Því miður verður bara að segjast eins og er að Evrópusambandið tekur smáþjóðir og gleypir þær í einum bita í morgunmat. Þær eiga engan séns þarna inni, það er ekki möguleiki að eiga við þetta bákn.“

Því spyr ég hæstv. ráðherra í ljósi þessara ummæla og þeirra mála sem Flokkur fólksins hefur lagt fram hér á þingi: Hvernig hyggst hæstv. ráðherra greiða atkvæði í komandi þjóðaratkvæðagreiðslu og hvernig hyggst flokkur hennar tala í aðdraganda þjóðaratkvæðagreiðslunnar? Nú hafa forsætisráðherra og utanríkisráðherra líka tjáð sig um nauðsynlegan stuðning þjóðarinnar í þessari atkvæðagreiðslu. Forsætisráðherra sagði hér fyrir kosningar að það væri eðlilegt að það væri aukinn meiri hluti, 70% á móti 30% var nefnt í því tilliti, en utanríkisráðherra hefur svarað því skýrt til að það sé bara einfaldur meiri hluti sem dugi. Hver er afstaða hæstv. ráðherra til þess? Dugar einfaldur meiri hluti, þ.e. 51% þeirra sem greiða atkvæði? Það er ekkert víst að það verði 100% kosningaþátttaka þannig að það kann vel að vera að minni hluti kosningarbærra aðila tjái sig með þeim hætti. Dugar það hæstv. ráðherra til að þessi vegferð verði hafin?

Virðulegur forseti. Þetta var mjög áhugavert. Þjóðin sem gekk að kjörborðinu fyrir rétt rúmu ári síðan og kaus á ekki einu sinni að fá að vita hvernig fulltrúar í einum stjórnarflokknum hyggjast tala í aðdraganda stærstu og mikilvægustu þjóðaratkvæðagreiðslu sem fram fer. Það kemur engum við hvernig formaður Flokks fólksins hyggst greiða atkvæði í þessari þjóðaratkvæðagreiðslu eða hvernig þingmenn hans tala í aðdragandanum. Fyrirgefið, virðulegur forseti, ég er bara eiginlega orðlaus. Hæstv. ráðherra hefur lýst því eindregið yfir að hann sé á móti aðild að Evrópusambandinu. Hér í þessum ræðustól hefur ítrekað heyrst að þau vilji ekki ganga lengra. Þau vildu taka þær höfnu samningaviðræður fyrir einhverjum árum síðan til baka. Nú á að greiða atkvæði um að halda áfram með þessar viðræður og þau vilja ekki einu sinni segja okkur hvernig þau ætla að kjósa.

Virðulegur forseti. Ég er algjörlega bit en verð þá ég að bæta við einni spurningu í viðbót: Telur hæstv. ráðherra ásættanlegt að Ísland verði aðili að sameiginlegu sjávarútvegsstefnunni? Og vegna þess að það kom eitt skýrt fram á blaðamannafundinum þegar þessi þingsályktunartillaga var tilkynnt, þegar blaðamaður spurði hæstv. ríkisstjórn um það hvort samningsmarkmiðin yrðu þau sömu og síðast og þá sagði hæstv. ráðherra: Nei, nei, nei, en í þingsályktunartillögunni sem hér liggur fyrir er bara fjallað um þau samningsmarkmið sem þá lágu fyrir. Hver eru samningsmarkmiðin? Hvaða umboð gefur hæstv. ráðherra samstarfsráðherra sínum í ríkisstjórn til að fara til Brussel og setjast við borðið? Hver eru rauðu strikin hjá hæstv. ráðherra?

Forseti biður hv. þingmenn að virða ræðutímann.