Samkomulag ESB í málefnum hælisleitenda

Virðulegi forseti. Því er nú fljótsvarað. Það kemur ekki til greina að fara að semja við Evrópusambandið um hluti sem eru ekki þættir í Evrópska efnahagssvæðinu. Við erum með hér á dagskrá í dag frumvarp um breytingar á hælisleitendakerfinu. Við fórum ekki til Brussel til að semja um það hvað mætti standa í því frumvarpi. Það var samið í íslenska Stjórnarráðinu, í dómsmálaráðuneytinu og flutt hingað inn í þingið af dómsmálaráðherra. Við munum taka okkar eigin sjálfstæðu ákvarðanir um að herða reglurnar, breyta t.d. því hvaða reglur eigi að gilda um fjölskyldusameiningar, í hversu langan tíma fólk geti fengið vernd og margt annað sem máli skiptir, hvaða málsmeðferð eigi að gilda þegar sótt er um alþjóðlega vernd á Íslandi o.s.frv. Þannig að það er engin ástæða til að hafa áhyggjur af því að við verðum dregin eða munum sogast inn í einhverjar hugmyndir Evrópusambandsins sem fjalla í raun og veru ekkert um landamæri Íslands heldur er þar verið að fást við þann veruleika að meginþunginn af sókn inn í ríki Evrópusambandsins kemur um Miðjarðarhafið sem leiðir til þess að sum ríki Evrópusambandsins taka við hlutfallslega langtum fleiri umsóknum um vernd heldur en önnur. Innan Evrópusambandsins er uppi sú skoðun að það sé sanngjarnt að dreifa byrðunum af þessari staðreynd betur milli aðildarríkja Evrópusambandsins heldur en á við í dag. Þetta er algerlega þeirra vandamál að fást við og það er hægt að hafa margar skoðanir á því hvernig þau eigi að reyna að leysa þetta. En það sem flest ríki eru að gera á Norðurlöndunum, og reyndar er sú umræða líka uppi í Evrópusambandinu, er að aðlaga löggjöf og reglur um þessi efni betur að lágmarkskröfum sáttmála Sameinuðu þjóðanna um þessi mál.

Virðulegi forseti. Ég deili áhuga hv. þingmanns á kökum og þó að maður eigi að gera meira af því að horfa á þær en að borða þær allar þá hvet ég hv. þingmann til að fá sér sneið af lýðveldiskökunni í sumar. Hún verður bökuð af íslenskum bökurum og bakarameisturum. En að öðru alvarlegra máli sem er ástandið í Georgíu. Það sem utanríkisráðherra er að gera er að taka þátt í sameiginlegri ferð utanríkisráðherra Norðurlandanna Eystrasalts. og Eystrasaltsríkjanna sem oft koma saman. Það er misjafnlega sterk mæting frá öllum ríkjum en þetta á rætur sínar í samstarfi Norðurlanda og Eystrasaltsríkjanna og þau eru ekki að taka afstöðu gegn stjórnvöldum heldur meira að kynna sér ástandið og hlýða á þau sjónarmið sem þar eru uppi. En það eru í alþjóðasamfélaginu uppi áhyggjur af því að gildi á borð við öflugt lýðræði og frjálsa fjölmiðlun séu að verða undir í því samfélagi fyrir áhrif erlendra afla.