Viðbrögð stjórnvalda við loftslagsáætlun ESB

Herra forseti. Ég þakka hv. þingmanni þessa fyrirspurn. Ég er eðli máls samkvæmt ekki alveg sammála því að ég hafi slegið úr og í í þessu viðtali. Hér er spurt um hvað gerist næst og sagt að ég skuldi svör við þessu máli einhvern veginn í heild sinni. Staðreyndin er sú að við erum í miðju verki. Málinu er ekki lokið Evrópusambandsmegin og ég stend algjörlega við að um er að ræða stærsta átak sem við höfum farið í, við byrjuðum fyrr og erum í raun ekki enn þá komin á þann stað þar sem við erum venjulega að óska eftir aðlögunum eða ákveðnu mótvægi áður en mál eru tekin upp í sameiginlegu EES-nefndina. Það er ekki rétt, og ég geri ráð fyrir að hv. þingmaður sé að vísa í Savkovic, að hann haldi á málinu einn og örlög okkar séu í hans höndum.

Ég sagði hins vegar það sem er satt og rétt í þessu viðtali, að ef engar breytingar verða á málinu þá mun það hafa miklar afleiðingar fyrir okkur og þess vegna leggjum við svo mikla áherslu á málið. Í lagasetningarferlinu hjá Evrópusambandinu náðust hins vegar fram breytingar sem skipta okkur vissulega máli, eins og þær að Evrópusambandið muni niðurgreiða verðmun á venjulegu flugvélaeldsneyti og vistvænu eldsneyti sem við gætum mögulega framleitt hér og þarf þá ekki að borga ETS-gjöld af því síðar, og sömuleiðis að gerð verði úttekt á heildaráhrifum af þessu öllu saman. Það dugir okkur hins vegar ekki og þess vegna erum við ekki hætt í okkar vinnu. Við erum þar af leiðandi í miðju verki og leggjum okkur fram við að ná fram þeim breytingum sem við teljum sanngjarnar og eðlilegar. Að okkar mati erum við ekki að biðja um hluti sem eru ósanngjarnir eða óeðlilegir og erum ekki heldur að biðja um að vera stikkfrí í málinu. Við erum að benda á að það að reikna út meðaltal og yfirfæra það á allt málið sé ekki tæmandi og ekki nægilega góð nálgun vegna þess að jaðaráhrifin eru slík hjá okkur, og við köllum eftir því að við þeim sé brugðist.

Herra forseti. Ég skil hv. þingmann vel, að hann komi hingað upp og ætlist til þess að ég svari eins skýrt og hann kallar eftir. Ég sagði skýrt í þessu viðtali og hef sagt það áður að við munum ekki standa að því að innleiða regluverk sem mun stórkostlega skaða hagsmuni Íslands. Mín ábyrgð er umfram allt að tryggja þá hagsmunagæslu sem þarf í þessu máli eins og öðrum og mitt mat er einfaldlega það að á þessum tímapunkti, út af þeim hagsmunum og út af þeirri ábyrgð, þá ætla ég að spila það eins skynsamlega og ég get. Ég tel ekki að hluti af því sé að vera með gífuryrði og risastórar yfirlýsingar á þessum tímapunkti og þess vegna ætla ég ekki að gera það. Þó að það myndi henta mér pólitískt betur að gera það akkúrat núna þá ætla ég ekki að gera það vegna þess að þetta snýst allt um þessa stærri hagsmuni, um samninginn í heild sinni. Ég hef sagt alveg skýrt að ég mun ekki tala fyrir því að innleiða regluverk sem mun skaða hagsmuni Íslands stórkostlega og þess vegna erum við að vinna að því að það verði einfaldlega ekki þannig.