Flutningur Útlendingastofnunar til Reykjanesbæjar

Frú forseti. Ég mæli hér fyrir tillögu til þingsályktunar um flutning Útlendingastofnunar til Reykjanesbæjar. Flutningsmenn eru hv. þingmenn Birgir Þórarinsson, Guðrún Hafsteinsdóttir, Vilhjálmur Árnason og Ásmundur Friðriksson. Tillagan hljóðar svo:

„Alþingi ályktar að stefna skuli að flutningi Útlendingastofnunar til Reykjanesbæjar.“

Þessi tillaga var áður flutt á 152. löggjafarþingi. Útlendingastofnun er ein af undirstofnunum dómsmálaráðuneytisins og starfar samkvæmt löggjöf um málefni útlendinga. Stofnunin hefur mikið verið í sviðsljósinu undanfarið vegna aukningar á umsóknum um alþjóðlega vernd á Íslandi og hefur mikið mætt á stofnuninni þessi misseri. Umfangsmesti þáttur í starfsemi Útlendingastofnunar er útgáfa dvalarleyfa, hvort sem um er að ræða dvalarleyfi á grundvelli atvinnuþátttöku eða t.d. fjölskyldusameiningar, námsvistar eða vistráðningar, og afgreiðsla umsókna um alþjóðlega vernd og umsókna um íslenskan ríkisborgararétt.

Stofnunin er til húsa í Kópavogi og þar starfa tæplega 90 manns. Mikill meiri hluti opinberra stofnana er á höfuðborgarsvæðinu, eins og við þekkjum. Af því leiðir að störf flestra stofnana standa í raun einungis íbúum höfuðborgarsvæðisins til boða, þótt vissulega sé það nú þannig að fólk ferðast um nokkuð langan veg til að sækja vinnu hér í Reykjavík, bæði frá Suðurlandi og svo á Suðurnesjum og Vesturlandi. Með flutningi Útlendingastofnunar til Reykjanesbæjar væri tekið stórt skref í átt að því að tryggja fjölbreytt atvinnutækifæri utan höfuðborgarsvæðisins. Á Suðurnesjum er hlutfall háskólamenntaðra mun lægra en landsmeðaltal segir til um og þær tölur sem gefa góða, glögga mynd af þessu eru afgerandi hvað þetta varðar. Mikill meiri hluti starfa hjá Útlendingastofnun eru sérfræðistörf sem krefjast háskólamenntunar. Með flutningi stofnunarinnar til Reykjanesbæjar væri því sérfræðistörfum fjölgað og þar með hlutfalli háskólamenntaðra á svæðinu. Ég tel það vera mikilvæg rök í þessari tillögu að reyna að sporna við þeirri þróun sem því miður hefur orðið á Suðurnesjum að það virðist vera lægra menntunarstig þegar kemur að störfum sem þessum. Þar að auki býr fjöldi innflytjenda á Suðurnesjum. Nýjustu tölur sem ég hef fengið varðandi þá sem eru að leita sér alþjóðlegrar verndar hér á landi eru að tæplega 500 einstaklingar séu búsettir á Suðurnesjum sem eru þá í þjónustu sveitarfélagsins og ríkisins. Það sjá það allir að þetta er mjög hátt hlutfall og að ég held það hæsta sem er á landinu eins og staðan er núna alla vega. Ef við horfum til Úkraínumanna, sem eru svolítið sér hvað þetta varðar,
þá eru þeir náttúrlega fjölmargir á höfuðborgarsvæðinu. En það er engu að síður hátt hlutfall þeirra á Suðurnesjum. Þessir aðilar nýta sér náttúrlega þjónustu stofnunarinnar, en um 9% íbúa í Reykjanesbæ eru af erlendum uppruna. Þá er rétt að líta til þess að yfirgnæfandi meiri hluti þeirra sem sækjast eftir alþjóðlegri vernd kemur til landsins í gegnum Keflavíkurflugvöll og því væri hentugt og ætti í raun að vera eðlilegt að stofnunin væri í meiri nálægð við flugvöllinn. Ég held að það séu orðnar ríkari ástæður fyrir því að þessi tillaga yrði samþykkt, líka í ljósi þess að hér hefur orðið mikil fjölgun umsókna um alþjóðlega vernd á mjög skömmum tíma. Velferðarsvið Reykjanesbæjar hefur auk þess séð um þjónustu og aðbúnað þeirra sem sækja um alþjóðlega vernd á Íslandi síðan 2004 og var fyrsta sveitarfélagið til að bjóða upp á þá þjónustu.

Ef við víkjum aðeins að fólksfækkun á landsbyggðinni vegna flutninga til höfuðborgarsvæðisins þá hefur það verið eitt af meginvandamálum samfélaga á landsbyggðinni, þ.e. skortur á störfum og lítil fjölbreytni starfa. Aukinn fjöldi og fjölbreytni starfa utan höfuðborgarsvæðisins eykur líkurnar á því að fólk af landsbyggðinni sem sækir sér menntun á höfuðborgarsvæðinu snúi aftur til heimabæjar síns eftir að námi lýkur. Það laðar jafnframt fremur að nýja íbúa.

Það er athyglisvert að skoða skýrslu Félagsvísindastofnunar Háskóla Íslands um samfélagsgreiningu á Suðurnesjum frá 8. október 2021. Þar kemur fram að atvinnulíf á Suðurnesjum sé einhæft og framboð atvinnu takmarkað. Þá kjósi margir íbúar svæðisins að starfa í Reykjavík þar sem fleiri möguleikar og fjölbreyttara úrval starfa sé í boði. Atvinnulífið í Reykjanesbæ er að miklu leyti háð flugsamgöngum og ferðaþjónustu. Þetta sáum við svo sannarlega í kórónuveirufaraldrinum þegar þessum störfum fækkaði mjög hratt á skömmum tíma og atvinnuleysið fór í hæstu hæðir á Suðurnesjum og var þá það mesta á landinu.

Flutningur Útlendingastofnunar til sveitarfélagsins myndi því ótvírætt fela í sér nauðsynlega fjölbreytni vinnumarkaðarins á Suðurnesjum, ekki síst sérfræðistörf sem krefjast háskólamenntunar. Ég rakti áðan nauðsyn þess að bæta hlutfall Suðurnesjanna hvað þetta varðar.

Atvinnumöguleikar ráða óneitanlega miklu þegar einstaklingar ákveða hvar skal búa, en þeir möguleikar eru umtalsvert minni í Reykjanesbæ en á höfuðborgarsvæðinu og bera opinberar tölur um atvinnuleysi það skýrlega með sér. Samkvæmt upplýsingum Vinnumálastofnunar var áætlað atvinnuleysi á höfuðborgarsvæðinu í desember 2021, tökum þá tölu hér, 5,0%, en á sama tíma var atvinnuleysi í Reykjanesbæ 9,9%. Þetta hefur verið þróunin í atvinnuleysistölum, þ.e. að viðvarandi atvinnuleysi virðist vera mest á Suðurnesjum. Slíkt misræmi í atvinnuleysi á milli bæjarfélaga er óheppilegt og því rétt að bregðast við með þeim hætti að auka framboð og fjölbreytni á atvinnu í Reykjanesbæ eins og hér er lagt til.

Þrátt fyrir að það geti verið eitthvert óhagræði fyrir núverandi starfsmenn Útlendingastofnunar að starfsemin verði flutt út fyrir höfuðborgarsvæðið þá er Reykjanesbær skammt frá höfuðborgarsvæðinu Ég er þeirrar skoðunar að það væri ekki sérstaklega íþyngjandi fyrir starfsmenn stofnunarinnar ef hún yrði flutt til Reykjanesbæjar og það eru margir íbúar í Reykjanesbæ sem hafa atvinnu hér á höfuðborgarsvæðinu og ekkert að því að sækja atvinnu frá höfuðborgarsvæðinu til Suðurnesja. Ég held að menn séu almennt sammála því.

Frú forseti. Að þessu sögðu þá held ég að það sé nauðsyn á því að efla þessa stofnun, Útlendingastofnun, bara í ljósi þess sem hefur gerst núna á undanförnum misserum, að hér hefur fjölgað mjög fólki sem sækir um alþjóðlega vernd og heimsmyndin í Evrópu hefur breyst mjög á skömmum tíma. Við þekkjum það að stríðið í Úkraínu hefur breytt Evrópu að ég held til frambúðar og sá gríðarlegi flóttamannastraumur sem er til Evrópu frá Úkraínu hefur svo sannarlega sýnt okkur mikilvægi þess að aðstoða fólk í stríðshrjáðum aðstæðum eins og í Úkraínu. Hingað eru nú komnir tæplega 2.000 einstaklingar frá Úkraínu og okkur hefur tekist vel að taka á móti þessu fólki. En þetta kallar á gríðarlega vinnu og mikið álag á starfsfólk eins og í Útlendingastofnun. Ég tel það bara vera hluta af því að ef stofnunin yrði flutt til Reykjanesbæjar þá myndi hún flytja þar í gott húsnæði og við munum reyna að efla þessa stofnun og hún yrði þá sem næst þeim sem leita þessarar þjónustu sem, eins og ég sagði áðan, koma í gegnum Keflavíkurflugvöll.

Allsherjar- og menntamálanefnd fór í fræðsluferð til Danmerkur og Noregs til að kynna sér útlendingamálin þar og löggjöfina og framkvæmdina í þeim efnum. Þessi ferð var mjög gagnleg fyrir nefndina. Þar komum við í útlendingaeftirlitið í Danmörku, það er bygging sem telur einar átta hæðir. Þar starfa tæplega 1.000 manns. Þar var afar vel búið að þessum starfsmönnum og störfin náttúrlega mörg hver krefjandi. Þetta er málaflokkur sem er að vaxa mjög. Samkvæmt nýjustu tölum frá Flóttamannastofnun Sameinuðu þjóðanna eru u.þ.b. 100 milljónir manna á flótta í heiminum í dag. Þess vegna er afar mikilvægt í fyrsta lagi að við mörkum okkur stefnu til framtíðar í þessum málaflokki. Fyrir liggur að hér verður lagt fram frumvarp dómsmálaráðherra um breytingu á þessum lögum sem lúta að þessum málaflokki og málefnum útlendinga og það er mikilvægt að það frumvarp fái afgreiðslu hér. Allt lýtur þetta að því að gera þessa vinnu skilvirkari. Þess vegna þurfum við á því að halda að þeir sem starfa í þessum geira séu vel settir með sína starfsaðstöðu og geti auk þess sinnt þessu mikilvæga starfi af fagmennsku, sem er mikilvægur þáttur í þessu öllu saman. Svo ég vísi aftur til fræðsluferðarinnar þá sáum við, eins og t.d. í Danmörku og í Noregi líka, að þeir eru framar okkur í þessum efnum.

Hér erum við aftarlega að mínu mati og hér gilda ákveðnar sérreglur sem við ættum ekki að hafa. Að mínum dómi eigum við bara að hafa sama kerfi og er á Norðurlöndunum. En það er ekki þannig í dag og vonandi náum við að stíga gott skref í þá átt með þessu frumvarpi dómsmálaráðherra sem verður lagt hér fram á þingi innan skamms. En maður sá það þarna í Danmörku að þar er mikil skilvirkni og eins hefur þeim tekist í Noregi að afgreiða þessar umsóknir á u.þ.b. 48 klukkustundum.

Allt skiptir þetta máli. Þetta er vaxandi málaflokkur og þess vegna held ég að það sé afar mikilvægt að við tökum það skref að bæta starfsaðstöðu þessa starfsfólks og flytja stofnunina til Reykjanesbæjar þar sem flestir eru sem nýta þjónustuna. Eins og ég nefndi eru núna u.þ.b. 500 manns sem eru í þjónustu bæði á vegum sveitarfélagsins og ríkisins sem eru að bíða eftir niðurstöðu varðandi það hvort þau eigi rétt á alþjóðlegri vernd hér á landi.

Að þessu sögðu, frú forseti, þá vísa ég þessari tillögu til allsherjar- og menntamálanefndar. Ég vona að hún fái góða umfjöllun þar og að við sjáum það verða að veruleika innan ekki svo langs tíma að þessi ágæta stofnun verði flutt nær þeim sem sækja þessa þjónustu, en í því tilfelli er lagt til, eins og áður segir, að hún verði flutt til Reykjanesbæjar.

Forseti. Ég þakka hv. þingmanni fyrir. Ég veit að hann hefur stórt hjarta fyrir atvinnuuppbyggingu á Suðurnesjum og í Reykjanesbæ og við deilum því göfuga markmiði.

Nei, ég hef engar áhyggjur af því að þetta auki álag á Reykjanesbæ. Ég átta mig ekki alveg á því hvað hv. þingmaður er að fara í þeim efnum. Þetta er stofnun sem u.þ.b. 90 starfsmenn starfa hjá og þarna erum við að færa sérfræðistörf — mörg þeirra eru sérfræðistörf — til Reykjanesbæjar. Það hefur sýnt sig, eins og ég nefndi í ræðu minni áðan, að hlutfall sérfræðistarfa háskólamenntaðra á Suðurnesjum er lágt og það lægsta í samanburði við aðra landshluta. Við þurfum að vinna í því að laga þessa hluti.

Það er vissulega rétt hjá hv. þingmanni að margir sem bíða eftir alþjóðlegri vernd eru á Suðurnesjum, t.d. uppi á Ásbrú, þar sem Útlendingastofnun hefur ekki haft nægilegt samráð við sveitarfélögin. Það er eitthvað sem þarf að bæta og ég held það væri meira að segja liður í þessu, ef stofnunin væri komin þarna suður eftir, að samráðið myndi eflaust verða eitthvað betra þó að það eigi ekki að vera forsenda fyrir því að flytja stofnunina.

En nei, ég óttast ekki að þetta geti haft í för með sér álag fyrir stofnunina. Ég sé ekki alveg hvernig hv. þingmaður fær það út. Það er vissulega álag á Reykjanesbæ vegna fjölda þeirra sem eru á svæðinu og bíða eftir alþjóðlegri vernd, ég tek heils hugar undir það. Við þurfum að vinna að því og það felur m.a. í sér að Útlendingastofnun komi ekki með einstaklinga eða finni búsetuúrræði í sveitarfélaginu án samráðs við sveitarfélagið sjálft. Það er lykilatriði í þessu.

En svo ég svari spurningunni þá hef ég ekki áhyggjur af þessu. Ég held að bæjarfélög muni fagna því að þarna komi störf sem krefjist menntunar á svæði sem þarf sannarlega á því að halda.

Forseti. Ég þakka hv. þingmanni. Ég hafði samráð og ræddi m.a. við framkvæmdastjóra Sambands sveitarfélaga á Suðurnesjum þegar ég vann þessa tillögu og leist framkvæmdastjóranum vel á hana. Hún er ekki kjörinn fulltrúi. Það er alveg rétt, hún er ekki kjörinn fulltrúi, en engu að síður starfsmaður sveitarfélaganna og hins sameiginlega vettvangs sveitarfélaganna. Ég hef líka rætt þetta við bæjarfulltrúa í Reykjanesbæ, þó ekki alla, en mér er það mjög til efs að kjörnir fulltrúar í Reykjanesbæ verði á móti þessari tillögu. Við höfum oft rætt að Suðurnesin hafi orðið algjörlega út undan. Þegar verið er að tala um flutning opinberra starfa á landsbyggðina hafa Suðurnesin alltaf setið á hakanum. Hér er verið að reyna að bæta úr því og ég styð heils hugar að Vinnumálastofnun verði líka flutt til Suðurnesja. Ég held það væri bara ágætt að hv. þingmaður myndi flytja slíka tillögu og ég vildi svo sannarlega vera meðflutningsmaður á henni.

Frú forseti. Ég þakka hv. þingmanni fyrir fyrirspurnina. Nei, það hefur nú ekki farið fram kostnaðarmat á þessu. Það hefur verið vinnureglan þegar svona tillögur fara til nefndar að þar sé farið yfir þann þátt. Ef þessi tillaga yrði samþykkt þá yrði kostnaðarmat gert í framhaldinu. Mér finnst það ekki vera aðalatriðið í þessu. Það er líka bara aðbúnaðurinn, að búa vel að starfsfólkinu og að það sé þá í nærveru við þá sem leita eftir þjónustunni, eins og við höfum nefnt og ég nefndi í minni ræðu, að mikilvægt sé og eðlilegt að þeir séu í návígi við þá sem eru að leita eftir þjónustunni. Þetta er jú þjónustustofnun. Þar er nærveran við Keflavíkurflugvöll mikilvægur þáttur.

Eins og var rakið hér áðan og hv. þm. Guðbrandur Einarsson nefndi þá eru fjölmargir á Suðurnesjum sem eru að leita eftir þessari þjónustu. Það yrði náttúrlega auðveldara fyrir þá að sækja sér þjónustuna þegar hún er í Reykjanesbæ heldur en er í dag.

Það er nú einu sinni þannig að stefnan hefur verið að fjölga störfum á landsbyggðinni. Eins og ég nefndi hér áðan hafa Suðurnesin verið út undan í þeim efnum og löngu tímabært að við förum að huga að því að þangað sé heppilegt að flytja eitthvað af þeim störfum sem eru hér á höfuðborgarsvæðinu. Fólk ferðast bæði til Suðurnesja til að sækja vinnu og frá Suðurnesjum til höfuðborgarsvæðisins að sækja vinnu þannig að ég sé ekki að í því sé óhagræði.

Varðandi kostnaðinn þá er það eitthvað sem verður farið vandlega yfir þegar og ef þessi tillaga verður samþykkt.

Frú forseti. Tillagan gengur út á það að starfsemin verði flutt frá Hafnarfirði og til Reykjanesbæjar. Ég sé ekki, hv. þingmaður, að þetta eigi að vera eitthvert óhagræði fyrir þá sem sækja þessa þjónustu. Þessi þjónusta er líka veitt bæði í gegnum síma og tölvupóst og annað slíkt þannig að það er ekki aðalatriðið í mínum huga. Stofnanir hafa verið fluttar áður út á land frá höfuðborgarsvæðinu. Jú, það eru náttúrlega bara misjafnar skoðanir á því eins og gengur og gerist en hér er ekki um það að ræða að þetta eigi að hafa mikið óhagræði í för með sér. Ég nefndi það sérstaklega í minni ræðu og held að ég hafi rökstutt það ágætlega. Þessi tillaga snýr að tvennu. Hún snýr að því að fjölga opinberum störfum á Suðurnesjum og sérfræðistörfum, sem er ekki vanþörf á, og bæta um leið þjónustustigið við þá sem þurfa að sækja þjónustuna. Þeir eru fjölmargir á Suðurnesjum eins og ég nefndi. En vissulega er það rétt hjá hv. þingmanni að þeir eru líka annars staðar hér á höfuðborgarsvæðinu. En þetta er kjarninn í þessari tillögu.

Forseti minnir hv. þingmann á að virða ræðutíma.

Frú forseti. Ég held að það skipti náttúrlega máli. Það er
gott að sem flestir flytji til sveitarfélagsins Reykjanesbæjar til að sækja sína atvinnu til þessarar stofnunar en það er að sjálfsögðu bara einstaklingsbundið eins og við þekkjum. Reykjanesbær hefur margt upp á að bjóða fyrir fjölskyldufólk og er framúrskarandi á mörgum sviðum, t.d. þegar kemur að skólamálum, leikskólamálum, íþróttaiðkun og öðru slíku. Þannig að það er gott að búa í Reykjanesbæ, svo sannarlega. Ég vona bara að fólk sjái kosti í því en það er heldur ekkert því til fyrirstöðu að fara á milli. Og við sjáum það. Ég bý á Suðurnesjum en ég sæki atvinnu til Reykjavíkur og síðan eru fjölmargir sem búa hér á höfuðborgarsvæðinu og sækja atvinnu til Suðurnesja. Þetta er að sjálfsögðu einstaklingsbundið en allir innviðir fyrir fjölskyldufólk eru hinir bestu í Reykjanesbæ.

Virðulegi forseti. Það er nú gaman að sjá að hér eru nánast eingöngu Suðurnesjamenn í þingsalnum. Við erum næstum því á bæjarstjórnarfundi í Reykjanesbæ með tvo fyrrverandi bæjarfulltrúa. Ég vil nú byrja á því að þakka hv. þm. Birgi Þórarinssyni fyrir þessa framgöngu, að leiða þetta mál. Ég fagna því mjög að við ræðum það hér. Ég var kannski hreinlega ekki undirbúinn fyrir þá umræðu núna að þurfa að berjast fyrir þessari þingsályktunartillögu, og alls ekki við góða og gegna heimamenn sem hafa setið í bæjarstjórn lengur en elstu menn muna. Hérna eru líka fyrrverandi bæjarfulltrúar úr nágrannabæjarfélögunum sem þekkja ágætlega til þessara mála.

Mér finnst nefnilega mikilvægt fyrir samfélagið okkar að við tölum þessi mál og þessa tillögu upp. Það er auðvitað hægt að finna eitthvað að henni eins og mörgu öðru sem við erum að gera hér í þinginu, einhverjar brotalamir sem betur hefðu mátt fara. Þannig er það nú bara og maður þekkir það svo sem að keyra hér á veggi fram og til baka. En mér finnst að þegar mál eins og þetta kemur upp á borðið sé eðlilegt að tveir ágætir fyrrverandi bæjarfulltrúar tali um samráð. Ég er sammála því. En það er líka algerlega óvíst hvað verður um þessa tillögu. Við þekkjum það hér að við leggjum oft mikla vinnu í tillögur og svo kemur ekkert út úr því. Ég held það sé mjög mikilvægt að það samráð fari fram á vegum nefndarinnar sem mun taka við þessari góðu tillögu og ræða hana.

Ég hræðist ekki að við séum að fá einhvern 80 manna vinnustað suður eftir. Ég vil minna okkur á það núna þegar farþegafjöldi á Keflavíkurflugvelli er upp í loft — fer úr 5 milljónum í 6 milljónir á þessu ári, 6 milljónum í 7 á næsta ári, síðan úr 7 milljónum í 8 og loks í 10 milljónir eftir örfá ár, sem er hinum megin við hornið — að við hverja milljón bætast við 1.000 starfsmenn á Keflavíkurflugvelli, eitt þúsund. Við skulum nú ekki alveg detta á hliðina þótt við séum að tala um 86 manns sem þurfa að keyra brautina í vinnuna af því ég held að þeir muni sjá fegurðina í því að búa suður frá mjög fljótlega.

En ég tek undir það sem hér hefur komið fram, það er auðvitað fyrir neðan allar hellur hversu margir yfirmenn á flugvellinum og sem vinna hjá sveitarfélögunum okkar búa ekki þar. Það er eðlilegt að þeir geti ekki allir búið innan sveitarfélagamarka á svæðinu en að þeir skuli meira og minna allir keyra úr Reykjavík er náttúrlega bara sérstakt mál fyrir okkur. En ég held sérstaklega að við sem erum staddir í salnum núna eigum að taka þessu fagnandi. Við eigum að sjá birtuna í þessu máli og þau tækifæri sem það felur í sér, ekki tala þetta niður og segja að þjónustan líði fyrir það og annað slíkt. Það eru fleiri staðir en Reykjavík sem geta boðið upp á þjónustu og það er allt til þess suður frá að bjóða upp á góða þjónustu. Ég vil bara minna á að við ætlum okkur, og það er stefna sveitarfélaga þarna suður frá, að byggja upp sérstaka flugvallarborg með hundruðum fyrirtækja sem tengjast Helguvík og flugvellinum. Þetta er einstök staða á Íslandi. Þetta er einstök staða í norðurhöfum, að á einum stað sé alþjóðaflugvöllur og höfn með 11–12 m dýpi fyrir skip af öllum stærðum. Þetta er miðstöð norðursjávarslóða sem hér eru ræddar á Arctic Circle reglulega og við eigum við að gera okkur gildandi í þessu. Við eigum ekki að verja það að starfsemi sem þegar er á höfuðborgarsvæðinu geti ekki komið suður eftir. Það þarf auðvitað að fara mjög varlega í það að flytja alla starfsemi. Við vitum að sumt af því sem við höfum gert hefur ekki alltaf lukkast vel og þess vegna skiptir líka mjög miklu máli, eins og hér hefur komið fram í máli hv. þingmanna, að það verði farið vel yfir þessi mál og þetta allt skoðað frá A til Ö, bæði hvað varðar sérfræðinga og þá sem hugsa sér að geta unnið þarna áfram ef af flutningi verður. Þetta mun taka langan tíma og hv. þingmenn þekkja það eins og ég að ef þetta verður ekki klárað á þessu þingi þá þarf að byrja upp á nýtt og málin þokast lítið áfram.

Í þessu máli vil ég bara minna á, og þetta er ekki mjög rafmagnsfrekt mál, að það er endalaust verið að kalla eftir rafmagni á Suðurnesin. Við, og ég núna, höfum náttúrlega kallað eftir Suðurnesjalínu 2, að hún kæmi. Við verðum öll saman að beita okkur fyrir því. Við fengum ályktanir Sambands sveitarfélaga á Suðurnesjum sendar í vikunni. Þar var ekki minnst á Suðurnesjalínu 2, ekki einu orði. Þetta er mikilvægasta málið okkar. Ef á að stækka flugvöllinn og halda áfram að keyra þarna upp þá þarf meira rafmagn. Það er verið að panta rafstöðvar sem framleiða 30 megavött með dísilorku fyrir Keflavíkurflugvöll og svæðið í kringum hann. 30 megavött framleidd með olíu í varaafl fyrir okkar svæði. Við eigum að berjast fyrir því að það þurfi ekki, berjast fyrir raforkuöryggi, berjast fyrir góðum, fjölbreyttum störfum og vera bjartsýn á framtíðina.

Virðulegi forseti. Ég þakka hv. þingmanni fyrir andsvarið. Ég ætlaði reyndar ekki að tala sérstaklega um útlendingamál undir þessum lið. Ég get þó tekið undir margt af því sem hér er sagt. Við sátum saman á fundi hjá lögreglustjóranum í Reykjanesbæ um daginn og heyrðum áhyggjur hans sem eru líka vegna þess hvernig er vaðið yfir þetta svæði. Ég er algerlega sammála því. Þess vegna hefur umræða verið um það í samfélaginu að það þurfi að gera einhverjar breytingar á þessu. Ég held að þær breytingar þurfi bara að koma fram og við getum þá rætt þær. Ég er algjörlega sammála því að uppbyggingarfasinn þarna suður frá hefði þurft að líta betur út en að þarna séu teknar blokkir undir hælisleitendur. Ég held að það hafi aldrei verið meiningin, enda held ég að þetta sé orðið miklu stærra vandamál en við reiknuðum með. Við þurfum líka að reyna að ræða það saman án þess að hlaupa alltaf út undan okkur og hafa sannleikann að leiðarljósi í því máli eins og öðrum.

En að heyra hv. þingmann — sem ræddi einmitt mál atvinnulífsins í gær og félagafrelsi, og var margt gott sem hann sagði þar — vera næstum því á móti atvinnuuppbyggingu á svæðinu. Ég held að við eigum að stefna að því að skapa á Suðurnesjum fjölbreytt störf og mjög mörg sveitarfélög í kjördæmi okkar kalla eftir fleiri eggjum í körfuna. Við þekkjum það í sjávarbyggðunum þar sem hafa verið mjög einhliða störf og það hefur náttúrlega verið hjá okkur. Við sáum það í Covid þegar flugið stoppaði að það vantaði meiri fjölbreytileika í störfin. Ég held við ættum að reyna að vinna að því saman, og hvort það er Útlendingastofnun eða eitthvað annað — þetta er nú ekki eins og menn dragi bara mannakorn úr skál og lesi heldur þurfum við að taka það sem passar inn í okkar svæði, ég er líka sammála því.

Virðulegur forseti. Ég þakka andsvarið. Ég tek undir með hv. þingmanni. Ég og Silja Dögg Gunnarsdóttir, fyrrverandi þingmaður, fluttum margar þingsályktunartillögur um að flytja Landhelgisgæsluna suður eftir. Ýmist var ég eða hún fyrsti flutningsmaður, en oftast hún. Það sem gerðist í framhaldi var að sú starfsemi, sem hentar mjög vel frá Gæslunni séð að fari suður eftir, er að koma þangað og er komin, þar á meðal þessi starfsemi við höfnina sem hér er minnst á og vel hefur verið unnið að, bæði af bænum og öðrum, og er frábær fyrirmynd að því hvernig sveitarfélög, ríki og stofnun eiga að vinna saman. Það er löngu vitað hversu mikil starfsemi er uppi á Keflavíkurflugvelli, Landhelgisgæslan er þar og eru auðvitað tugir — ég var þar í heimsókn síðast í gærmorgun — sem líta eftir starfseminni. Ég er því algerlega sammála að við eigum að halda áfram á þeim vettvangi.

En ég held líka að flugsækin starfsemi, hvort sem hún er vel eða illa þokkuð, eigi auðvitað að vera þar sem flugið er. Það er lykillinn að því sem við erum að tala um, að flugsækin starfsemi á heima í svokallaðri flugborg sem við ætlum að reisa í kringum Keflavíkurflugvöll og er stærsta atvinnutækifæri framtíðarinnar á Íslandi myndi ég halda. Ég held að þótt málaflokkarnir séu erfiðir þá sé það ekki þannig að sú starfsemi hafi á sér vonda ímynd. Það eru erfiðleikar fyrir margar stofnanir en suma þeirra getum við lagað með því að veita þeim meira fé. Ég held að ef stofnun bætist við suður eftir þá kosti það ekki að aðrar fái minna fé. Það er undir okkur komið. Það er áskorun fyrir okkur öll að standa betur að því að fjármagna rekstur ríkisins.

Virðulegur forseti. Ég vil byrja á því að þakka hv. þm. Ingu Björk Margrétar Bjarnadóttur. Til hamingju með að vera komin hingað til okkar. Ég held að það sé mjög mikilvægt að það verði friður og ró um þessa starfsemi ef þetta verður. Ég held að það sé mjög mikilvægt að fram fari vönduð vinna í því hvernig þetta verður gert, með hvaða hætti við munum flytja þessa stofnun verði af því. Við töluðum um Landhelgisgæsluna áðan. Þar hefur það gerst að hluti af starfseminni sem menn telja að eigi betur við í Reykjanesbæ og á Ásbrú er kominn þangað og er að flytja þangað. Þannig gæti það hugsanlega verið með þessa stofnun, að menn sæju tækifæri í því að hluti af henni eða hún öll, það er ekki vitað á þessari stundu, gæti farið suður eftir.

Hvort það eigi að leita til þeirra sem njóta þjónustunnar, ég átta mig kannski ekki alveg á því en ég tel mjög mikilvægt að byggja á því hvernig þjónustan gengur fyrir sig og hvernig hún er mest sótt. Er hún sótt mest í gegnum tölvur eða er hún sótt mest í gegnum það að fólk mæti á staðinn, í fýsískar heimsóknir, eins og maður segir, eða á fundi? Ég þekki það auðvitað ekki alveg nógu vel sjálfur. Það er eitt af því sem nefndin sem fer í málið þarf bara að athuga. Ég segi bara fyrst og fremst að þó að ég hafi ekki viljað tala um útlendingamál per se þá er ég alveg tilbúinn að tala um þá sem þurfa að nýta starfsemi þessara stofnana, sem eru auðvitað mikið til útlendingar. Ég held að hluti af því að færa stofnunina suður eftir sé að færa hana nær þeim sem nýta hana mest. Ætli það séu ekki einhver 95 eða 97% af ferðamönnum sem koma til landsins sem fara í gegnum Flugstöð Leifs Eiríkssonar.

Virðulegi forseti. Ég þakka hv. þm. Ingu Björk Margrétar Bjarnadóttur sömuleiðis kærlega fyrir. Ég vil bara segja henni að ég gerði fullt af mistökum þegar ég byrjaði að fara fyrstu skrefin mín upp í púltið. Þú þarft nú alls ekki að skammast þín fyrir það þótt þér hafi orðið einhver fótaskortur á tungunni. Ég held að það sé bara manndómsmerki að bæði viðurkenna það og svo getur það hent okkur öll. Ég vil líka þakka þér kærlega fyrir umræðuna og þær fyrirspurnir sem þú komst með til mín og eins það sem þú lagðir hér inn í málið áðan. Ég held að það sé mikilvægt fyrir okkur öll að vanda okkur við þetta mál eins og öll önnur og að það sé bara fullt af tækifærum í þessu fyrir okkur, fyrir Suðurnes og svo er mikill lærdómur í því að fara í gegnum þetta mál og sjá hverju það getur skilað.

Forseti sér sig knúinn til þess að benda reyndum þingmönnum á að tala ekki til annarra þingmanna í fyrstu eða annarri persónu.