Staða Íslands gagnvart ESB

149. löggjafarþing Mál nr. 502 4. febrúar 2019 Sjá á Alþingi.is ↗
4 ræður
2 þingmenn
729 orð
2 flokkar
Miðflokkurinn Vinstrihreyfingin - grænt framboð

Ríkisstjórn

Katrín Jakobsdóttir
Vinstrihreyfingin - grænt framboð
2 ræður 365 orð

Stjórnarandstaða

Sigmundur Davíð Gunnlaugsson
Miðflokkurinn
2 ræður 364 orð

Tímalína umræðunnar

4. febrúar 2019
Sigmundur Davíð Gunnlaugsson Miðflokkurinn ræða
205 orð
Forseti. Eins og hæstv. forsætisráðherra veit hefur ekki alltaf verið fullkomin málefnaleg samstaða í stjórnarandstöðunni. Það er eðlilegt því að stjórnarandstaða er ekki mynduð um sameiginlega stefnu. Við höfum einsett okkur í Miðflokknum að styðja aðra flokka í góðum málum, hvort sem þeir eru í ríkisstjórn eða ekki. Nú er komið að því að gleðja hæstv. forsætisráðherra. Eins og hæstv. ráðherra er vel kunnugt um sleit Ísland viðræðum við Evrópusambandið 12. mars 2015. Ég fylgdi því svo eftir…

Forseti. Eins og hæstv. forsætisráðherra veit hefur ekki alltaf verið fullkomin málefnaleg samstaða í stjórnarandstöðunni. Það er eðlilegt því að stjórnarandstaða er ekki mynduð um sameiginlega stefnu. Við höfum einsett okkur í Miðflokknum að styðja aðra flokka í góðum málum, hvort sem þeir eru í ríkisstjórn eða ekki. Nú er komið að því að gleðja hæstv. forsætisráðherra.

Eins og hæstv. ráðherra er vel kunnugt um sleit Ísland viðræðum við Evrópusambandið 12. mars 2015. Ég fylgdi því svo eftir með bréfi og heimsóknum til Jean-Claudes Junckers og Donalds Tusks til að árétta að umsókn Íslands hafi endanlega verið dregin til baka, væri fallin úr gildi. Í vikunni hyggst ég leggja fram þingsályktunartillögu, leggja til að Alþingi fagni því að umsóknin um aðild að Evrópusambandinu sé úr sögunni en álykti um leið að ekki skuli sótt um að nýju án þjóðaratkvæðagreiðslu.

Ég ætlast ekki til að hæstv. forsætisráðherra lýsi yfir stuðningi við þingsályktunartillögu sem er ekki komin fram en getur hæstv. forsætisráðherra tekið undir það með mér að það sé fagnaðarefni að umsókn Íslands um aðild að Evrópusambandinu skuli hafa verið dregin til baka? Og jafnframt að menn sæki ekki aftur um aðild að ESB án þess að almenningur hafi fyrst lýst vilja til þess í þjóðaratkvæðagreiðslu?

Katrín Jakobsdóttir Vinstrihreyfingin - grænt framboð ræða
177 orð
Herra forseti. Ég þakka hv. þingmanni fyrir að vekja máls á stöðu Íslands gagnvart Evrópusambandinu. Þegar við sóttum um aðild að Evrópusambandinu 2009, m.a. með mínu atkvæði, var lögð fram tillaga um að þjóðaratkvæðagreiðsla skyldi haldin áður en slík umsókn yrði lögð fram. Sú tillaga var felld og ég hef sagt það seinna meir að það hefði verið öllum til góða að samþykkja þá tillögu og ráðast í slíka þjóðaratkvæðagreiðslu áður en ákveðið var að sækja um aðild. Mín skoðun er sú að það…

Herra forseti. Ég þakka hv. þingmanni fyrir að vekja máls á stöðu Íslands gagnvart Evrópusambandinu. Þegar við sóttum um aðild að Evrópusambandinu 2009, m.a. með mínu atkvæði, var lögð fram tillaga um að þjóðaratkvæðagreiðsla skyldi haldin áður en slík umsókn yrði lögð fram. Sú tillaga var felld og ég hef sagt það seinna meir að það hefði verið öllum til góða að samþykkja þá tillögu og ráðast í slíka þjóðaratkvæðagreiðslu áður en ákveðið var að sækja um aðild.

Mín skoðun er sú að það hefði verið betra, að það hafi ekki verið rétt ákvörðun hjá okkur, sem stóðum að því að fella þá tillögu, að fella hana. Það er stórmál, meiri háttar mál, að ákveða að fara í slíkar aðildarviðræður og því vil ég segja hv. þingmanni að ég hef sagt það síðan, eftir að hafa ígrundað þessi mál og farið yfir þau töluvert vel, ekki síst á vettvangi minnar hreyfingar, að ég myndi telja óráð að ráðast í slíka umsókn á nýjan leik án þess að fram færi þjóðaratkvæðagreiðsla. Ég er sammála hv. þingmanni um það.

Sigmundur Davíð Gunnlaugsson Miðflokkurinn ræða
159 orð
Forseti. Það er ánægjulegt að heyra. Ég skil þá hæstv. ráðherra sem svo að það sé hennar skoðun að fullt tilefni sé til þess fyrir Alþingi að árétta að ekki skuli sótt um aðild aftur án þess að almenningur, þjóðin, hafi lýst yfir vilja til þess í þjóðaratkvæðagreiðslu. En hvað með fyrra atriðið? Er hæstv. ráðherra ekki líka sammála mér um að það sé mjög ánægjulegt, að það hafi verið góð niðurstaða að Ísland skuli hafa dregið umsókn sína til baka og að við skulum ekki hafa hana hangandi…

Forseti. Það er ánægjulegt að heyra. Ég skil þá hæstv. ráðherra sem svo að það sé hennar skoðun að fullt tilefni sé til þess fyrir Alþingi að árétta að ekki skuli sótt um aðild aftur án þess að almenningur, þjóðin, hafi lýst yfir vilja til þess í þjóðaratkvæðagreiðslu. En hvað með fyrra atriðið? Er hæstv. ráðherra ekki líka sammála mér um að það sé mjög ánægjulegt, að það hafi verið góð niðurstaða að Ísland skuli hafa dregið umsókn sína til baka og að við skulum ekki hafa hana hangandi yfir okkur núna? Ég tala nú ekki um þegar við sjáum hvernig hlutirnir hafa þróast í Evrópusambandinu á þeim árum sem liðin eru í millitíðinni og vandræðin sem Bretar standa frammi fyrir við að reyna að komast út úr því. Er ekki óhætt að segja að það hafi verið vel sloppið hjá okkur Íslendingum að dragast ekki lengra þar inn og hafa dregið umsókn um aðild að Evrópusambandinu til baka?

Katrín Jakobsdóttir Vinstrihreyfingin - grænt framboð ræða
188 orð
Herra forseti. Ég þakka hv. þingmanni aftur fyrir. Ég tók nú orð hv. þm. Sigmundar Davíðs Gunnlaugssonar trúanleg þegar hann bað mig ekki um að lýsa beinni afstöðu til óframkominnar þingsályktunartillögu. Ég ætla að spara mér fagnaðarlætin en vil þó segja að ég held að við getum dregið mjög mikinn lærdóm af öllu því sem gerðist í kringum Evrópusambandsumsóknina og líka af því þegar hún var dregin til baka, því að þá var auðvitað líka óskað eftir þjóðaratkvæðagreiðslu um afstöðu fólks til…

Herra forseti. Ég þakka hv. þingmanni aftur fyrir. Ég tók nú orð hv. þm. Sigmundar Davíðs Gunnlaugssonar trúanleg þegar hann bað mig ekki um að lýsa beinni afstöðu til óframkominnar þingsályktunartillögu. Ég ætla að spara mér fagnaðarlætin en vil þó segja að ég held að við getum dregið mjög mikinn lærdóm af öllu því sem gerðist í kringum Evrópusambandsumsóknina og líka af því þegar hún var dregin til baka, því að þá var auðvitað líka óskað eftir þjóðaratkvæðagreiðslu um afstöðu fólks til Evrópusambandsins. Í kringum það að umsóknin var afturkölluð var raunar mikil krafa uppi um að leita eftir afstöðu þjóðarinnar.

Ég ætla að láta mér nægja að segja að ef þessi þingsalur gæti sammælst um að leita leiðsagnar þjóðarinnar áður en nýjar ákvarðanir eru teknar held ég að það væri farsælt fyrir þjóðina. Sjálf hef ég ekki breytt þeirri skoðun að ég tel enga ástæðu til þess að sækja um aðild að Evrópusambandinu. En ég hef líka alltaf lýst þeirri skoðun að ég er reiðubúin að leita leiðsagnar þjóðarinnar ef vilji þingsins stendur til þess að fara aftur í þessa vegferð. Minn vilji stendur ekki til þess.