Framkvæmdir við Reykjanesbraut

Guðmundur Ingi Kristinsson Flokkur fólksins ræða

2018-09-20 10:59 291 orð

Virðulegi forseti. Ég hljóma kannski eins og biluð grammófónplata í ræðustól vegna þess að fyrir tæpu ári talaði ég um nákvæmlega sama hlutinn, Reykjanesbraut, við hæstv. samgönguráðherra. Reykjanesbraut er einn slysamesti kafli landsins og við þökkum fyrir að komin eru mislæg gatnamót við Vellina, við Straumsvík, en bæjarstjórn Hafnarfjarðar er enn að álykta og, með leyfi forseta, ætla ég að lesa hérna: „Bæjarstjórn Hafnarfjarðar krefst þess að ráðherrar og alþingismenn sjái til þess að í…

Virðulegi forseti. Ég hljóma kannski eins og biluð grammófónplata í ræðustól vegna þess að fyrir tæpu ári talaði ég um nákvæmlega sama hlutinn, Reykjanesbraut, við hæstv. samgönguráðherra. Reykjanesbraut er einn slysamesti kafli landsins og við þökkum fyrir að komin eru mislæg gatnamót við Vellina, við Straumsvík, en bæjarstjórn Hafnarfjarðar er enn að álykta og, með leyfi forseta, ætla ég að lesa hérna:

„Bæjarstjórn Hafnarfjarðar krefst þess að ráðherrar og alþingismenn sjái til þess að í nýrri og endurskoðaðri vegáætlun sem lögð verður fram nú á haustþingi, verði fjármagn tryggt til að ráðast í þessar brýnu framkvæmdir á Reykjanesbrautinni í gegnum Hafnarfjörð.

…

Mikil fjölgun ferðamanna á undanförnum árum sem fara í gegnum Leifsstöð er fordæmalaus. Sú staðreynd ásamt mikilli fjölgun íbúa á Reykjanesi og í Hafnarfirði hefur leitt til þess að umferð um Reykjanesbraut hefur margfaldast. Þetta álag á einfalda brautina í gegnum Hafnarfjörð hefur leitt til mikilla umferðartafa á þeim kafla og sífellt fleiri slysa. Er því ljóst að ekki er hægt að bíða lengur með að ráðast í tvöföldun hennar á þeim kafla.“

Alkunna er alvarlegt ástand vegarkaflans, slys eru þar tíð og umferðarþungi gríðarlegur. Og þá spyr ég ráðherra: Hvernig á að leysa þennan kafla, gatnamótin við Kaplakrika og gatnamótin við Lækjargötu? Einnig langar mig að vita hvernig eigi að leysa vandann þó að búið sé að tvöfalda, þann vanda að þarna stíflast allt? Það er algjörlega stíflað á hverjum einasta morgni, frá Straumsvík og inn úr, eins og við vitum. Búið er að taka af dagskrá ofanbyggðaveg sem var á dagskrá fyrir 30 árum þegar ég flutti í Hafnarfjörð en hann er farinn. Það virðist engin lausn vera á því að leysa þetta og ég spyr samgönguráðherra hvort hann sé með einhverja frábæra lausn á þessu vandamáli.

Sigurður Ingi Jóhannsson Framsóknarflokkur ræða

2018-09-20 11:01 319 orð

Virðulegi forseti. Ég þakka hv. þm. Guðmundi Inga Kristinssyni fyrirspurnina. Það er rétt sem hann segir, við ræddum þetta akkúrat, fyrir kannski ekki ári en fyrr á þessu kjörtímabili, um nákvæmlega hvaða lausnir væru mögulegar á að leysa umferðarhnúta og auka umferðarflæðið. Og ekki síst öryggið á Reykjanesbrautinni sem er, alveg eins og hv. þingmaður nefnir, einn allra umferðarmesti vegur landsins og því miður allt of tíð slys og jafnvel alvarleg. Nú er samgönguáætlun vonandi að koma …

Virðulegi forseti. Ég þakka hv. þm. Guðmundi Inga Kristinssyni fyrirspurnina. Það er rétt sem hann segir, við ræddum þetta akkúrat, fyrir kannski ekki ári en fyrr á þessu kjörtímabili, um nákvæmlega hvaða lausnir væru mögulegar á að leysa umferðarhnúta og auka umferðarflæðið. Og ekki síst öryggið á Reykjanesbrautinni sem er, alveg eins og hv. þingmaður nefnir, einn allra umferðarmesti vegur landsins og því miður allt of tíð slys og jafnvel alvarleg.

Nú er samgönguáætlun vonandi að koma inn í þing til umræðu í næstu viku og þá getum við auðvitað farið betur ofan í þetta. En af því að hv. þingmaður spyr hvaða lausnir séu hefur Vegagerðin verið að hanna og allar slíkar lausnir eru tilbúnar og það er þá spurningin um forgangsröðunina. Ég vil í sjálfu sér ekki segja hvernig þetta kemur til með að líta út fyrr en við erum búin að kynna samgönguáætlun þannig að allir fái tækifæri að standa og sitja við sama borð hvað það varðar.

Ég hef sagt að það sé augljóst að þegar slys á landinu kosta okkur kannski 40–60 milljarða á ári í umferðinni, í samgöngunum, leggjum við mesta áherslu á umferðaröryggi í nýrri samgönguáætlun. Það er ekkert leyndarmál og hluti af því að leysa það er einmitt að takast á við þá vegi þar sem slysin eru tíðust og alvarlegust og umferðarþunginn hvað mestur. Þetta mun sem sagt skýrast betur í næstu viku þegar við getum vonandi rætt samgönguáætlunina í þinginu.

Varðandi ofanbyggðaveg sem hv. þingmaður benti einmitt á að hefði hugsanlega getað leyst þarna einhverjar leiðir fram hjá, svona þeim þéttustu, er það skipulagsmál sveitarfélaganna. Ég held að menn þurfi svolítið að horfa til langs tíma, næstu 30–40 ára, og sjá fyrir sér hvernig umferðin í gegnum og fram hjá höfuðborgarsvæðinu á að vera. Það eiga ekki allir leið inn í miðbæ Reykjavíkur og þar af leiðandi þurfa að vera til einhverjar leiðir til að komast þar fram hjá.

Guðmundur Ingi Kristinsson Flokkur fólksins ræða

2018-09-20 11:04 189 orð

Virðulegi forseti. Ég þakka hæstv. samgönguráðherra svörin. Ég hefði viljað fá vegáætlunina miklu fyrr fyrir þingið þannig að við hefðum getað skoðað hana betur. Við verðum að átta okkur á því að nú er sá tími að koma að við verðum einn til tvo klukkutíma úr Hafnarfirði til Reykjavíkur og svo aftur einn til einn og hálfan tíma frá Reykjavík til Hafnarfjarðar með tilheyrandi mengun. Það er óásættanlegt næstu 20–30 árin. Ég bara trúi þessu ekki og ég skil ekki af hverju við erum ekki byrjuð…

Virðulegi forseti. Ég þakka hæstv. samgönguráðherra svörin. Ég hefði viljað fá vegáætlunina miklu fyrr fyrir þingið þannig að við hefðum getað skoðað hana betur. Við verðum að átta okkur á því að nú er sá tími að koma að við verðum einn til tvo klukkutíma úr Hafnarfirði til Reykjavíkur og svo aftur einn til einn og hálfan tíma frá Reykjavík til Hafnarfjarðar með tilheyrandi mengun. Það er óásættanlegt næstu 20–30 árin. Ég bara trúi þessu ekki og ég skil ekki af hverju við erum ekki byrjuð að taka á því vandamáli.

Það er alltaf verið að tala um að slysin kosti svo mikið, að þau kosti tugi ef ekki hundruð milljarða. Þarna er stór slysabrunnur og við verðum að byrgja hann. En við verðum líka að hugsa rökrétt. Er eðlilegt að sitja í bíl í allt að einn og hálfan til tvo tíma á leiðinni frá Hafnarfirði til Reykjavíkur? Ég segi bara: Guð hjálpi þeim sem eru að koma alla leiðina utan af Reykjanesi. Hvað eru þeir lengi að komast leiðar sinnar? Þeir þurfa að fara í gegnum Garðabæ og Kópavog og eru kannski á leiðinni út úr bænum.

Sigurður Ingi Jóhannsson Framsóknarflokkur ræða

2018-09-20 11:05 176 orð

Virðulegi forseti. Það er alveg rétt að einn vandinn, sérstaklega á höfuðborgarsvæðinu og sérstaklega á þeirri leið sem hv. þingmaður nefnir, er að umferðarflæði er ekki nógu gott. Það er vegna þess að allt of margir eru að fara í sömu átt á sama tíma. Það getur vel verið að vegamannvirki geti ekki eitt leyst slíka hnúta. Skólar gætu t.d. byrjað á öðrum tíma, hugsanlega síðar. Menn hafa talað um að unga fólkið okkar þurfi meiri svefn. Væri kannski skynsamlegt að framhaldsskólarnir byrjuðu…

Virðulegi forseti. Það er alveg rétt að einn vandinn, sérstaklega á höfuðborgarsvæðinu og sérstaklega á þeirri leið sem hv. þingmaður nefnir, er að umferðarflæði er ekki nógu gott. Það er vegna þess að allt of margir eru að fara í sömu átt á sama tíma. Það getur vel verið að vegamannvirki geti ekki eitt leyst slíka hnúta. Skólar gætu t.d. byrjað á öðrum tíma, hugsanlega síðar. Menn hafa talað um að unga fólkið okkar þurfi meiri svefn. Væri kannski skynsamlegt að framhaldsskólarnir byrjuðu aðeins seinna? Með sveigjanlegum vinnutíma gæti fólk kannski valið hvenær það fer af stað og mætir til vinnu þannig að ekki væru allir á ferð á sama tíma. Svo má ekki gleyma því að kannski er ekki skynsamlegt að hafa alla stærstu vinnustaði landsins á einum stað. Það getur verið skynsamlegra að hafa þá á fleiri stöðum þannig að fólk fari í tvær áttir í stað þess að allir fari í sömu átt á sama tíma.

Það eru til nokkrar leiðir fyrir utan vegamannvirki sem gætu leyst stíflur, svo það sé nú sagt.

Framkvæmdir við Reykjanesbraut

Ríkisstjórn

Stjórnarandstaða

Tímalína umræðunnar