Innleiðing þriðja orkupakka ESB

149. löggjafarþing Mál nr. 212 8. nóvember 2018 Sjá á Alþingi.is ↗
4 ræður
2 þingmenn
1.177 orð
2 flokkar
Miðflokkurinn Sjálfstæðisflokkur

Ríkisstjórn

Þórdís Kolbrún Reykfjörð Gylfadóttir
Sjálfstæðisflokkur
2 ræður 614 orð

Stjórnarandstaða

Sigmundur Davíð Gunnlaugsson
Miðflokkurinn
2 ræður 563 orð

Tímalína umræðunnar

8. nóvember 2018
Sigmundur Davíð Gunnlaugsson Miðflokkurinn ræða
298 orð
Virðulegur forseti. Fyrir nokkrum dögum spurði ég hæstv. utanríkisráðherra út í svokallaðan þriðja orkupakka Evrópusambandsins. Eins og hæstv. forseti man eflaust eftir varð ráðherrann frekar ergilegur, vissi ekkert hvað sér ætti að finnast um þennan orkupakka og kenndi því helst um að ég hefði ekki beitt mér nóg á sínum tíma fyrir auknum fjárveitingum til utanríkismála, ef ég skildi hann rétt. Var þá ráðherrann ekki fremstur í flokki þeirra sem vildu auka slík framlög. Ástæðan fyrir því að…

Virðulegur forseti. Fyrir nokkrum dögum spurði ég hæstv. utanríkisráðherra út í svokallaðan þriðja orkupakka Evrópusambandsins. Eins og hæstv. forseti man eflaust eftir varð ráðherrann frekar ergilegur, vissi ekkert hvað sér ætti að finnast um þennan orkupakka og kenndi því helst um að ég hefði ekki beitt mér nóg á sínum tíma fyrir auknum fjárveitingum til utanríkismála, ef ég skildi hann rétt. Var þá ráðherrann ekki fremstur í flokki þeirra sem vildu auka slík framlög.

Ástæðan fyrir því að ég kem upp hér í dag, til að spyrja hæstv. iðnaðarráðherra út í þetta mál, er sú að ég er að vonast eftir því að ráðherra málaflokksins hér innan lands hafi skýrari svör fyrir mig um hvers sé að vænta af stjórnvöldum varðandi þennan þriðja orkupakka.

Ég spyr hæstv. ráðherra: Hver er afstaða ráðherrans til þriðja orkupakka Evrópusambandsins og innleiðingar hans?

Þetta er rétti tíminn til að spyrja því að ekki er seinna vænna að gera ráðstafanir eða a.m.k. lýsa afstöðu íslenskra stjórnvalda og fara þá að vinna í samræmi við þá afstöðu, fara að vinna að því að Ísland fái undanþágu frá þessum ákvæðum. Að undanförnu hafa ýmsir menn tjáð sig um þetta mál, málsmetandi menn. Kunnur norskur lagaprófessor varar Íslendinga við því að við séum með þessu að afsala okkur hluta fullveldisins og yfirráðum yfir innlendum orkumálum, hagsmunum okkar á mörgum sviðum. Það hafa íslenskir lögmenn gert líka. Formaður Sambands garðyrkjubænda telur að þetta muni í raun leggja atvinnugrein hans af, hafa veruleg áhrif á matvælaframleiðslu í landinu almennt og svo mætti lengi telja.

Í öllu falli er ljóst að ekki verður búið við algjöra óvissu af hálfu stjórnvalda hvað varðar meðferð þessa máls. Ég vona því að hæstv. ráðherra muni veita mér skýrari svör en ég fékk frá hæstv. utanríkisráðherra fyrir nokkrum dögum. Þau voru mjög skýr.

Þórdís Kolbrún Reykfjörð Gylfadóttir Sjálfstæðisflokkur ræða
386 orð
Herra forseti. Ég þakka hv. þingmanni fyrirspurnina og skal reyna að svara henni skýrt. Mér fannst svör hæstv. utanríkisráðherra ekki jafn óskýr og hv. þingmanni. Sú rosalega óvissa sem hv. þingmaður reynir að koma að felst eingöngu í því að verið er að skoða málið nánar en gert hefur verið, m.a. vegna þess að ég hef hlustað á þær áhyggjur sem menn hafa varpað fram og alls konar spurningar sem við höfum reynt að svara. Sum svör vilja menn bara ekki heyra og halda áfram að halda einhverju fram…

Herra forseti. Ég þakka hv. þingmanni fyrirspurnina og skal reyna að svara henni skýrt. Mér fannst svör hæstv. utanríkisráðherra ekki jafn óskýr og hv. þingmanni. Sú rosalega óvissa sem hv. þingmaður reynir að koma að felst eingöngu í því að verið er að skoða málið nánar en gert hefur verið, m.a. vegna þess að ég hef hlustað á þær áhyggjur sem menn hafa varpað fram og alls konar spurningar sem við höfum reynt að svara. Sum svör vilja menn bara ekki heyra og halda áfram að halda einhverju fram sem er ekki rétt.

Ég er ekki að segja að hv. þingmaður sé að gera það en ýmsir í umræðunni gera það. Það er alveg sama hvaða upplýsingar menn koma með, talað er niður til þeirra sem mest vita um málið. Mér finnst ekki góður bragur á því, en allt í góðu.

Við höfum lagt töluverða vinnu í að reyna að koma á framfæri upplýsingum og staðreyndum um málið. Af því að hv. þingmaður nefndi sérstaklega formann Sambands garðyrkjubænda segi ég ekki annað en að það er mikill ábyrgðarhluti að koma fram og segja að heil atvinnugrein geti orðið úti ef menn innleiða hér ákveðnar tilskipanir og reglugerðir frá Evrópusambandinu. Þetta mál hefur verið í kerfinu frá því löngu fyrir mína tíð.

Ég var rétt að byrja laganám þegar þetta hófst. Ég hef komið til þingsins með allar þær upplýsingar sem hafa verið innan kerfisins. Mér finnst satt að segja allt í lagi að benda á að þeir sem nú hafa hæst í þingsal, hv. þm. Sigmundur Davíð Gunnlaugsson og hv. þm. Gunnar Bragi Sveinsson, eiga töluvert í því hversu langt málið er komið og aldrei óskaði neinn eftir undanþágum frá þessum tveimur reglugerðum. Óskað var eftir undanþágum frá öðru, reglugerð varðandi gas af því að hér er ekki gas.

Ég vil líka að fram komi að það er vandamál við málið að ekki eru margir sem berjast fyrir því. Ástæðan fyrir því að erfitt er að berjast fyrir því er að það skiptir ekki svo miklu máli. Á endanum snýst þetta um EES-samninginn. Ef menn ætla að fara í ferðalag og segja að þeir ætli ekki að innleiða þetta hefur það áhrif á EES-samninginn. Þá þurfa menn að vera tilbúnir í þann leiðangur og ég er ekki að segja að ég sé ekki tilbúin í hann.

Sigmundur Davíð Gunnlaugsson Miðflokkurinn ræða
265 orð
Virðulegur forseti. Akkúrat þegar ég hélt að ráðherrann væri að koma með hið endanlega svar var snúið við og bent á að hugsanlega væri hún til í að fara í baráttu gegn EES-samningnum svoleiðis að enn er ég engu nær. Hæstv. ráðherra lýsir því að ráðuneytið sé mikið búið að reyna að útskýra málin fyrir fólki, en þær útskýringar virðast fyrst og fremst snúa að því að reyna að útskýra hvers vegna þetta sé ekkert til að hafa áhyggjur af, með öðrum orðum útskýra hvers vegna eigi bara að innleiða…

Virðulegur forseti. Akkúrat þegar ég hélt að ráðherrann væri að koma með hið endanlega svar var snúið við og bent á að hugsanlega væri hún til í að fara í baráttu gegn EES-samningnum svoleiðis að enn er ég engu nær.

Hæstv. ráðherra lýsir því að ráðuneytið sé mikið búið að reyna að útskýra málin fyrir fólki, en þær útskýringar virðast fyrst og fremst snúa að því að reyna að útskýra hvers vegna þetta sé ekkert til að hafa áhyggjur af, með öðrum orðum útskýra hvers vegna eigi bara að innleiða þetta.

Hæstv. ráðherra nefndi líka að málið væri búið að vera lengi í kerfinu og þess vegna væri hægt að kenna öllum sem hafa starfað í íslenskri stjórnsýslu væntanlega um það að ráðherrann treysti sér ekki til að kveða skýrt upp úr um málið núna. En þeim mun lengur sem þetta er búið að vera í kerfinu, þeim mun meiri upplýsingar hljóta menn að hafa og tilefni, ástæðu og getu til að kveða upp úr um það hvernig eigi að nálgast þetta mál. Það þýðir ekki að bíða þangað til það er orðið of seint að gera nokkurn skapaðan hlut.

Við hljótum eftir öll þessi ár sem ráðherrann nefndi að vera komin í aðstöðu til þess að kveða skýrt upp úr um það hvernig íslensk stjórnvöld ætla að nálgast þetta mál, hvort þau ætli að hleypa þessu öllu í gegn og halda áfram að veita upplýsingar um hvers vegna þurfi að gera það, eða fara í þá baráttu við EES-samninginn sem ráðherrann nefndi eða einfaldlega nálgast þetta á skynsamlegan hátt og innleiða ekki þennan pakka.

Þórdís Kolbrún Reykfjörð Gylfadóttir Sjálfstæðisflokkur ræða
228 orð
Herra forseti. Það er áhugavert að hlusta á hv. þingmann segja að nú séum við komin í aðstöðu til að gera sem mest. Eins og ég nefndi áðan hefur þetta mál verið inni í kerfinu í fjöldamörg ár. Ég kom inn í ráðuneytið í upphafi árs 2017 og mjög margir, m.a. hv. þingmaður, hefðu getað haft ýmislegt um málið að segja á fyrri stigum en gerðu ekkert í því að reyna að koma fleiri undanþágum að en við gerðum á sínum tíma. Það er líka þannig, og ég held að það þekki allir í þessum þingsal, að…

Herra forseti. Það er áhugavert að hlusta á hv. þingmann segja að nú séum við komin í aðstöðu til að gera sem mest. Eins og ég nefndi áðan hefur þetta mál verið inni í kerfinu í fjöldamörg ár. Ég kom inn í ráðuneytið í upphafi árs 2017 og mjög margir, m.a. hv. þingmaður, hefðu getað haft ýmislegt um málið að segja á fyrri stigum en gerðu ekkert í því að reyna að koma fleiri undanþágum að en við gerðum á sínum tíma.

Það er líka þannig, og ég held að það þekki allir í þessum þingsal, að þegar menn ætla að hafa eitthvað um það að segja hvað er innleitt hér, þegar við fáum tilskipanir og reglugerðir, er það einmitt á fyrstu stigum máls sem það er gert. Hvernig hefur þeim málum verið háttað undanfarin ár? Við erum núna fyrst að setja fjármuni í að tryggja hagsmuni okkar þannig að við séum með betri hagsmunagæslu úti en verið hefur. Það hefur ekki verið undanfarin ár með þeim hætti sem best hefði verið. En nú er það hér.

Þegar hv. þingmaður talar um skynsemi er það akkúrat mitt leiðarljós í þessu máli. Þess vegna erum við líka að skoða það og þess vegna ætla ég ekki að standa upp hér og taka undir allt sem hv. þingmaður er að segja og fallast á það sem hann beinir til mín.