Aðild að Evrópusambandinu

138. löggjafarþing Mál nr. 594 22. febrúar 2010 Sjá á Alþingi.is ↗
4 ræður
2 þingmenn
919 orð
2 flokkar
Framsóknarflokkur Samfylkingin

Ríkisstjórn

Össur Skarphéðinsson
Samfylkingin
2 ræður 490 orð

Stjórnarandstaða

Sigurgeir Sindri Sigurgeirsson
Framsóknarflokkur
2 ræður 429 orð

Tímalína umræðunnar

22. febrúar 2010
Sigurgeir Sindri Sigurgeirsson Framsóknarflokkur ræða
306 orð
Frú forseti. Mig langar að beina fyrirspurn til hæstv. utanríkisráðherra um aðild að Evrópusambandinu. Í síðustu viku var stödd hér á landi Diana Wallis, varaforseti Evrópuþingsins. Í samtali við fjölmiðla sagði hún að þjóð eins og Íslendingar sem glímir við efnahagsvanda mætti ekki líta á inngöngu í Evrópusambandið sem einhverja skyndilausn. Því til staðfestu nefndi hún Grikkland sem dæmi um að hvorki evran né ESB væri töfralausn á efnahagsvanda þjóða. Það var einnig ágætisáminning frá…

Frú forseti. Mig langar að beina fyrirspurn til hæstv. utanríkisráðherra um aðild að Evrópusambandinu. Í síðustu viku var stödd hér á landi Diana Wallis, varaforseti Evrópuþingsins. Í samtali við fjölmiðla sagði hún að þjóð eins og Íslendingar sem glímir við efnahagsvanda mætti ekki líta á inngöngu í Evrópusambandið sem einhverja skyndilausn. Því til staðfestu nefndi hún Grikkland sem dæmi um að hvorki evran né ESB væri töfralausn á efnahagsvanda þjóða.

Það var einnig ágætisáminning frá varaforsetanum að skynsamlegt sé fyrir ríkisstjórnina að fara sér að engu óðslega í aðildarviðræðum og að mikilvægt sé að sátt sé um málið meðal íslensku þjóðarinnar.

Íslenska þjóðin er fyrir löngu búin að átta sig á því að ESB-aðild er ekki sú töfralausn sem ríkisstjórnin hefur haldið fram og ljóst er að þær kannanir sem hafa verið gerðar benda til þess að mikill meiri hluti þjóðarinnar er andvígur aðild að Evrópusambandinu. Samtök iðnaðarins hafa t.d. látið gera könnun sem sýnir mikla andstöðu, Samtök atvinnulífsins hafa nýlega birt könnun meðal atvinnurekenda sem sýnir að 60% þeirra eru á móti aðild og þekkt er andstaða hagsmunaaðila í landbúnaði og sjávarútvegi. Enn fremur er kunn staða margra stjórnarliða úr röðum Vinstri grænna og skemmst er að minnast ummæla hv. þm. Ögmundar Jónassonar um að hann hefði aldrei verið andvígari en einmitt nú. Einkar athyglisvert var er hann sagði, með leyfi forseta:

„Skrifræðisbáknið í Brussel er óseðjandi ófreskja.“

Af framansögðu er ljóst að vafi leikur á meiri hluta fyrir málinu á þingi og því eðlilegt að velta fyrir sér hvort nú sé ekki rétti tíminn til að endurskoða málið svo ekki myndist hin nafntogaða gjá milli þings og þjóðar. Mig langar því að spyrja hæstv. utanríkisráðherra hvort til greina komi í ljósi þessarar andstöðu almennings og þingmanna

að draga umsóknina til baka og spara með því gríðarlega fjármuni sem gætu nýst í atvinnuuppbyggingu og velferðarþjónustu.

Össur Skarphéðinsson Samfylkingin ræða
314 orð
Frú forseti. Framkvæmdarvaldið lýtur löggjafanum. Alþingi Íslendinga ákvað að sækja um aðild að Evrópusambandinu og það var ákvörðun sem var tekin að undangengnum löngum og ströngum umræðum. Niðurstaðan varð sú að láta á það reyna. Það liggur ljóst fyrir þannig að það er alveg klárt að ríkisstjórnin framfylgir vilja Alþingis. Ef sú staða kemur upp að Alþingi endurskoði afstöðu sína hefur það ákveðnar afleiðingar eins og hv. þingmaður hlýtur að skilja. Þinginu er algjörlega frjálst að…

Frú forseti. Framkvæmdarvaldið lýtur löggjafanum. Alþingi Íslendinga ákvað að sækja um aðild að Evrópusambandinu og það var ákvörðun sem var tekin að undangengnum löngum og ströngum umræðum. Niðurstaðan varð sú að láta á það reyna. Það liggur ljóst fyrir þannig að það er alveg klárt að ríkisstjórnin framfylgir vilja Alþingis.

Ef sú staða kemur upp að Alþingi endurskoði afstöðu sína hefur það ákveðnar afleiðingar eins og hv. þingmaður hlýtur að skilja. Þinginu er algjörlega frjálst að leggja fram, rökræða og samþykkja hvaða tillögu sem það vill þannig að þetta er undir þinginu komið. Við erum að framfylgja ákvörðun þingsins.

Hv. þingmaður dró í efa að hér væri meiri hluti fyrir því að sækja um aðild að Evrópusambandinu og láta kjósa um það í þjóðaratkvæðagreiðslu þegar samningar liggja fyrir. Hv. þingmaður nefndi sérstaklega hv. þm. Ögmund Jónasson og að hann hefði ítrekað andstöðu sína við aðild að Evrópusambandinu. Má ég þá rifja upp fyrir hv. þingmanni að í sama viðtali sagði umræddur þingmaður það algjörlega skýrt að hann mundi hins vegar verja rétt Íslendinga til að fá sjálfir að taka afstöðu í atkvæðagreiðslu.

Það er alveg rétt sem hv. þingmaður segir, eins og sakir standa hafa veður skipast í lofti varðandi Evrópusambandið. Ég tel og hef rökstutt það í þessum stóli að það stafi ekki síst af þeim deilum sem hafa spunnist millum okkar og annarra þjóða út af Icesave. Ég bendi samt sem áður á að af þeim 18 skoðanakönnunum sem Samtök iðnaðarins hafa látið gera á umliðnum árum hefur verið meiri hluti fyrir aðild í öllum nema tveimur. Í þeirri könnun sem hv. þingmaður vísaði til og var gerð á vegum Samtaka iðnaðarins kom líka alveg skýrt fram að það var sterkur meiri hluti meðal þeirra sem tóku þátt í þeirri könnun fyrir því að skipta um gjaldmiðil.

Hvernig eigum við að gera það með öðrum hætti en að láta á þetta reyna?

Sigurgeir Sindri Sigurgeirsson Framsóknarflokkur ræða
123 orð
Frú forseti. Ég þakka hæstv. utanríkisráðherra fyrir þetta svar. Það var ágætt sem hann sagði í sinni ræðu, að hér hafa skipast veður í lofti og staðan er breytt í þjóðfélaginu. Þess vegna er eðlilegt að menn hafi þetta alltaf í endurskoðun hverju sinni. Það er rétt sem hann sagði, auðvitað verður þingið að ákveða það og væri kannski skynsamlegast að fram kæmi þingsályktunartillaga um það. Þó að menn dragi í efa skoðanakannanir og annað slíkt er mjög mikilvægt að menn taki slíkt mál út af…

Frú forseti. Ég þakka hæstv. utanríkisráðherra fyrir þetta svar. Það var ágætt sem hann sagði í sinni ræðu, að hér hafa skipast veður í lofti og staðan er breytt í þjóðfélaginu. Þess vegna er eðlilegt að menn hafi þetta alltaf í endurskoðun hverju sinni. Það er rétt sem hann sagði, auðvitað verður þingið að ákveða það og væri kannski skynsamlegast að fram kæmi þingsályktunartillaga um það. Þó að menn dragi í efa skoðanakannanir og annað slíkt er mjög mikilvægt að menn taki slíkt mál út af borðinu ef það er ekki vilji þjóðarinnar að fara í gríðarlega kostnaðarsamt aðildarferli. Þegar ljóst er að meiri hluti þjóðarinnar mun segja nei er mjög eðlilegt að hugsa um hvernig maður ver fjármunum ríkisins á hverjum tíma.

Össur Skarphéðinsson Samfylkingin ræða
176 orð
Frú forseti. Það er ekki ljóst fyrir fram að meiri hluti þjóðarinnar muni segja nei. Ég leyfi mér t.d. að draga í efa að sá hópur landbúnaðarins sem hv. þingmaður hefur staðið fyrir, þ.e. sauðfjárbændur, muni þegar til kastanna kemur segja nei. Af hverju? Vegna þess að ég tel t.d. að aðild að Evrópusambandinu muni leiða til þess að ákveðnir geirar landbúnaðarins komi betur út innan Evrópusambandsins en ekki. En ég þarf ekki að segja þjóðinni það, ég þarf ekki að segja þinginu það. Það geta…

Frú forseti. Það er ekki ljóst fyrir fram að meiri hluti þjóðarinnar muni segja nei. Ég leyfi mér t.d. að draga í efa að sá hópur landbúnaðarins sem hv. þingmaður hefur staðið fyrir, þ.e. sauðfjárbændur, muni þegar til kastanna kemur segja nei. Af hverju? Vegna þess að ég tel t.d. að aðild að Evrópusambandinu muni leiða til þess að ákveðnir geirar landbúnaðarins komi betur út innan Evrópusambandsins en ekki.

En ég þarf ekki að segja þjóðinni það, ég þarf ekki að segja þinginu það. Það geta menn ákveðið sjálfir þegar samningurinn liggur fyrir. Ég leyfi mér að efast um að fyrir fram sé hægt að segja að afstaða þjóðarinnar muni falla á einn eða annan veg. Ég tel t.d. að þingmenn Framsóknarflokksins sem eru bæði vel upplýstir og greindir og umburðarlyndir muni láta hinn raunverulega samning ráða afstöðu sinni. Lengi er von á einum, en ég hef alltaf verið fullur af trúnaðartrausti gagnvart getu

Framsóknarflokksins til að taka skynsamlegar ákvarðanir þó að nú um stundir sé kannski ekki hægt að benda á mörg dæmi um það.