Kynningarefni fyrir þjóðaratkvæðagreiðslu um Icesave

Virðulegi forseti. Ég þakka fyrirspurnina. Staðan er þannig að nú er utankjörfundaratkvæðagreiðsla hafin og ráðuneytið er búið að opna kynningarvef um framkvæmd þjóðaratkvæðagreiðslunnar á vefnum kosning.is. Eins og hv. þingmaður kom réttilega inn á í máli sínu var lögð á það áhersla af hálfu allsherjarnefndar að útbúið yrði hlutlaust kynningarefni og að því höfum við unnið. Markmið vinnunnar er að útbúinn verði texti sem lýtur að staðreyndum byggðum á opinberum upplýsingum og að slíkt kynningarefni yrði útbúið þannig að auðvelt væri fyrir kjósandann að kynna sér það.

Að þessu sögðu verð ég líka að minna á að þjóðaratkvæðagreiðsla snýst um að leggja mál í dóm upplýstrar þjóðar. Það hefur farið fram mikil umræða og á eftir að fara fram mikil umræða víðs vegar í þjóðfélaginu. Það sem við höfum lagt aðaláherslu á í ráðuneytinu er að við berum ábyrgð á framkvæmd kosninganna og þar má ekki bera skugga á þannig að dómsmálaráðuneytið verður að gæta þess að taka ekki þátt í umræðunni með þeim hætti að skugga beri á framkvæmdina. Þess vegna höfum við miðað að því að hægt verði að útbúa þetta kynningarefni byggt á staðreyndum sem fram koma í opinberum gögnum. Við vonumst til að þetta sé hægt og við vonumst til að geta komið með einhvers konar kynningu á því hvernig við sjáum þetta fyrir okkur í byrjun næstu viku.

Virðulegur forseti. Ég tek sannarlega undir það, það verður að vanda til verka. Ég ítreka það sem ég sagði áðan hvað þá nálgun okkar varðar að við viljum frekar segja minna en meira. Við erum að huga að því hvort hægt sé að útbúa efni sem byggir þá á staðreyndum. Það er vandsamt að leggja þetta fram en ég tel að okkur beri skylda til að gera tilraun. Okkur ber skylda til að gera þetta, vanda okkur og gera þetta af heiðarleika en hvort síðan verði almenn ánægja með niðurstöðurnar er ekki gott að segja. Auðvitað vona ég það og auðvitað óska ég eftir samvinnu við alla þingflokka í þessum efnum.