Aðildarumsókn Íslands að ESB

138. löggjafarþing Mál nr. 1018 9. júní 2010 Sjá á Alþingi.is ↗
4 ræður
2 þingmenn
1.034 orð
2 flokkar
Sjálfstæðisflokkur Vinstrihreyfingin - grænt framboð

Ríkisstjórn

Unnur Brá Konráðsdóttir
Sjálfstæðisflokkur
2 ræður 501 orð

Stjórnarandstaða

Steingrímur J. Sigfússon
Vinstrihreyfingin - grænt framboð
2 ræður 533 orð

Tímalína umræðunnar

9. júní 2010
Unnur Brá Konráðsdóttir Sjálfstæðisflokkur ræða
297 orð
Hæstv. forseti. Að öllu óbreyttu verða þáttaskil í umræðum um aðild Íslands að Evrópusambandinu í þessum mánuði. Taki Alþingi Íslendinga ekki ákvörðun um að draga umsóknina að Evrópusambandinu til baka fyrir 17. júní verður væntanlega tekin ákvörðun um það þann dag þar úti að hefja viðræður við Ísland. Við þekkjum öll forsögu þessa máls sem bar hvað hæst þegar það fór í gegnum þingið. Við þekkjum það að ýmsir stjórnarþingmenn tóku þá afstöðu með þessu máli Samfylkingarinnar þrátt fyrir að…

Hæstv. forseti. Að öllu óbreyttu verða þáttaskil í umræðum um aðild Íslands að Evrópusambandinu í þessum mánuði. Taki Alþingi Íslendinga ekki ákvörðun um að draga umsóknina að Evrópusambandinu til baka fyrir 17. júní verður væntanlega tekin ákvörðun um það þann dag þar úti að hefja viðræður við Ísland.

Við þekkjum öll forsögu þessa máls sem bar hvað hæst þegar það fór í gegnum þingið. Við þekkjum það að ýmsir stjórnarþingmenn tóku þá afstöðu með þessu máli Samfylkingarinnar þrátt fyrir að stefna annars stjórnarflokksins, Vinstri grænna, hafi verið skýr gegn því að Ísland færi inn í Evrópusambandið. Það hefur komið fram að það treystir sér varla nokkur maður í ríkisstjórninni til að bera pólitíska ábyrgð á þessu máli. Hæstv. utanríkisráðherra hefur sagt að þingið beri ábyrgðina en það kemur fram í máli hans að ríkisstjórnin hafi ekkert með þetta að gera.

Það eru breyttar forsendur í málinu. Evrusvæðið á mjög undir högg að sækja þannig að það er algerlega ljóst að þau rök aðildarsinna að ganga verði í Evrópusambandið til að tryggja efnahagslegan stöðugleika á Íslandi eru fallin. Þá hafa aðildarsinnar líka sagt að upptaka evru mundi þýða litla verðbólgu og lága vexti. Dæmin frá Evrópu segja okkur að það sé ekki rétt. Viðbrögð Evrópusambandsríkjanna við þeirri upplausn sem blasir við í efnahagsmálum aðildarríkjanna er að reyna að auka miðstýringu frá Brussel og þess vegna verða spurningarnar varðandi fullveldi Íslands enn sterkari. Mig langar því að beina þeirri spurningu til hæstv. fjármálaráðherra hversu mikið afsal fullveldis Íslendinga verði með Evrópusambandsaðild. Er það ekki ljóst af hálfu ríkisstjórnarinnar að það er ekki smekklegt að ákvörðun verði tekin í þessu máli þar úti á þjóðhátíðardegi Íslendinga? Er það ekki algerlega ljóst að ríkisstjórnin hefur beitt sér fyrir því að sú ákvörðun verði ekki tekin þann dag okkur öllum til niðurlægingar?

Steingrímur J. Sigfússon Vinstrihreyfingin - grænt framboð ræða
351 orð
Frú forseti. Ég hef ekki mikið með þessar fundadagsetningar hjá Evrópusambandinu að gera og ég þekki ekki nákvæmlega hvernig það atvikaðist svo að til standi að halda fund 17. júní. Þeir hafa sennilega ekki verið mjög uppteknir af því hvað sá dagur þýddi í þessu samhengi. Ég hygg að það væri þá frekar utanríkisráðherra sem gæti svarað spurningum hv. þingmanns um það hvernig það móverk gengur fyrir sig. Meiri hluti Alþingis samþykkti að leggja þessa umsókn inn og…

Frú forseti. Ég hef ekki mikið með þessar fundadagsetningar hjá Evrópusambandinu að gera og ég þekki ekki nákvæmlega hvernig það atvikaðist svo að til standi að halda fund 17. júní. Þeir hafa sennilega ekki verið mjög uppteknir af því hvað sá dagur þýddi í þessu samhengi. Ég hygg að það væri þá frekar utanríkisráðherra sem gæti svarað spurningum hv. þingmanns um það hvernig það móverk gengur fyrir sig.

Meiri hluti Alþingis samþykkti að leggja þessa umsókn inn og láta þar með á það reyna í viðræðum hvaða samningum hægt væri að ná og það verður svo þjóðin sem á síðasta orðið í þeim efnum. … rétt.

Ég get tekið undir það með hv. þingmanni að ástæða er til að hafa áhyggjur af þróun mála í Evrópu. Það þyrftum við að hafa algerlega óháð því hvort hér væri umsóknarferli í gangi eða ekki. Evrópa er einu sinni okkar langmikilvægasta markaðssvæði, bæði á sviði útflutnings og innflutnings, og hagvaxtarmöguleikar og framþróun hér er mjög tengd því hvernig gengur í Evrópu. Þess vegna er það áhyggjuefni að þar eru blikur á lofti og óróleiki, hvort sem við horfum á gjaldmiðilsstöðuna eða einfaldlega viðgang í hagkerfum okkar stóru markaðslanda í Evrópu. Ég held að við hljótum þar af leiðandi að hafa af því áhyggjur og það væri afar óskynsamlegt og illa ígrundað að vera með einhverja þórðargleði yfir því, burt séð frá afstöðu manna til Evrópusambandsins, hvort hyggilegt er að ganga í það eða ekki, að ástand mála er þar ótryggt og jafnvel víða versnandi.

Að sama skapi held ég að við ættum ekki að vera of beygð yfir þó þeirri stöðu sem við erum smátt og smátt að ná, að koma á jafnvægi í okkar hagkerfi og það er vöxtur landsframleiðslu annan ársfjórðunginn í röð. Menn geta auðvitað gert lítið úr slíku ef þeir vilja eins og ég sé að sumir reyna, sumir fjölmiðlar, en það er sá viðsnúningur sem það er vísbending um sem er okkur afar dýrmæt. Hvaða svör eru þetta? Ég var búinn að svara spurningunni, hv. þingmaður, og ég ræð því hvernig ég nota restina af ræðutíma mínum, hv. frammíkallandi.

Unnur Brá Konráðsdóttir Sjálfstæðisflokkur ræða
204 orð
Hæstv. forseti. Ég vona að það hafi ekki legið í orðum hæstv. fjármálaráðherra að ég hafi verið eitthvað glöð yfir ástandinu í Evrópu. Ég get fullvissað hann um að svo er ekki, ég hef miklar áhyggjur af því. Ég hef enn meiri áhyggjur af því að hér inni séu aðilar sem hafa enga sannfæringu fyrir því að við eigum að ganga í Evrópusambandið, sem hafa ekki tekið af skarið og sagt að við verðum að draga umsóknina til baka. Við erum að eyða tíma og peningum í eitthvert villuljós og það er…

Hæstv. forseti. Ég vona að það hafi ekki legið í orðum hæstv. fjármálaráðherra að ég hafi verið eitthvað glöð yfir ástandinu í Evrópu. Ég get fullvissað hann um að svo er ekki, ég hef miklar áhyggjur af því. Ég hef enn meiri áhyggjur af því að hér inni séu aðilar sem hafa enga sannfæringu fyrir því að við eigum að ganga í Evrópusambandið, sem hafa ekki tekið af skarið og sagt að við verðum að draga umsóknina til baka. Við erum að eyða tíma og peningum í eitthvert villuljós og það er algerlega ástæðulaust fyrir okkur að vera að eyða meiri kröftum í þessa umsókn.

Mér finnst það niðurlægjandi fyrir íslenska þjóð ef Brusselveldið ætlar að taka þessa ákvörðun 17. júní og ég skora á hæstv. fjármálaráðherra, sem ég veit að hefur enga sannfæringu fyrir því að Íslandi sé betur borgið innan Evrópusambandsins en utan, að beita sér nú fyrir því við ríkisstjórnarborðið að málið fari ekki á þennan veg. Það er einfaldlega ekki boðlegt fyrir okkur að setja þann skugga á þjóðhátíðardaginn okkar að þetta mál verði í hámælum. Mér finnst það ekki boðlegt fyrir íslenska þjóð og hæstv. fjármálaráðherra væri maður að meiri ef hann mundi standa með okkur í þessu máli.

Steingrímur J. Sigfússon Vinstrihreyfingin - grænt framboð ræða
182 orð
Nú er það þannig, frú forseti, að við munum væntanlega ekki fresta 17. júní þó að ónefndur maður hafi látið fresta jólunum á hinni öldinni. Hvort hægt er að fá hið mikla Evrópusamband til að breyta fundaplani sínu skal ósagt látið og eins og ég segi er það ekki beint á mínu verksviði. Ég hvet þá hv. þingmann til að ræða það mál við utanríkisráðherra. Hann er vaskur maður og vígreifur og það kann vel að vera að hann sé til í að leggja í þann leiðangur að biðja Evrópusambandið að endurskoða…

Nú er það þannig, frú forseti, að við munum væntanlega ekki fresta 17. júní þó að ónefndur maður hafi látið fresta jólunum á hinni öldinni. Hvort hægt er að fá hið mikla Evrópusamband til að breyta fundaplani sínu skal ósagt látið og eins og ég segi er það ekki beint á mínu verksviði. Ég hvet þá hv. þingmann til að ræða það mál við utanríkisráðherra. Hann er vaskur maður og vígreifur og það kann vel að vera að hann sé til í að leggja í þann leiðangur að biðja Evrópusambandið að endurskoða fundaplön sín.

Alþingis er það, ásamt með stjórnvöldum, að meta framvindu þessara mála. Ef ég man rétt er það beinlínis tekið fram í ályktuninni og nefndaráliti nefndarinnar, að sjálfsögðu skiptir það máli að fylgjast með framvindu málsins og þróun þess og það er einmitt ætlunin að gera. Komi upp einhver ný staða í þeim efnum, sem væntanlega væri þá af stærra tilefni en þessu, getur Alþingi að sjálfsögðu gert það. Það var skrifað inn í textana að menn mundu að sjálfsögðu fylgjast með framvindu málsins og hvernig þetta allt gengi.