Hugsanleg aðild Noregs að ESB

2003-10-06 15:03:16# 130. lþ. 4.1 fundur 45#B hugsanleg aðild Noregs að ESB# (óundirbúin fsp.), forsrh. [prenta uppsett í dálka] 4. fundur , 130. lþ.

[15:03]

Forsætisráðherra (Davíð Oddsson) :

Herra forseti. Það er alveg rétt hjá hv. þingmanni að ég hef oft og iðulega átt samtöl við Kjell Magne Bondevik, forsætisráðherra Noregs, um Evrópumál, bæði formleg og óformleg. Ekki höfum við þurft að fljúga hvor til annars í hvert skipti heldur höfum við einnig átt margvísleg símtöl um þau efni í rás tímans og ég þykist þekkja ágætlega viðhorf hans til þeirra mála. Ég er ekki endilega að segja að þau séu nákvæmlega upp á hvern stafkrók þau sömu og ég hef haft en þó hefur margt verið sambærilegt og svipað.

Ég hef nú rétt haft tíma til að skoða þessi tilfærðu ummæli sem hv. þm. nefnir. Mér sýnist að það séu afar margir fyrirvarar slegnir af hálfu forsætisráðherra Noregs og ég sé ekki að ummæli míns ágæta vinar, norska forsætisráðherrans, gefi tilefni til þess að ég endurskoði afstöðu mína. Með mikilli og langri vináttu og virðingu þarf samt meira til að hagga mér þó að aðrir vilji skoða einhverja hluti, þ.e. ef undanþágur fengjust frá öllum mögulegum hlutum sem ekki er líklegt að undanþágur fengjust fyrir. Ég sé þetta ekki sem eins mikil tímamót og þeir þarna hjá netútgáfu Aftenpostens.

2003-10-06 15:06:10# 130. lþ. 4.1 fundur 45#B hugsanleg aðild Noregs að ESB# (óundirbúin fsp.), forsrh. [prenta uppsett í dálka] 4. fundur , 130. lþ.

[15:06]

Forsætisráðherra (Davíð Oddsson) :

Herra forseti. Hv. þingmanni skjöplaðist aðeins undir það síðasta. Ég er ekki að setja á fót aldamótanefnd, heldur Evrópunefnd en í aldamótanefndinni sem hv. þm. nefndi og hefur oft nefnt til sögunnar sátu fleiri en ég. Þar sátu til að mynda hv. þm. Einar Oddur Kristjánsson og Sigríður A. Þórðardóttir þó að ég hefði formennsku í nefndinni. Ég hef í rauninni ekkert skipt um skoðun frá þeim tíma sem ég hafði formennsku í þeirri nefnd. Ég taldi á þeim tíma að menn þyrftu að skoða ýmsa kosti sem væru hugsanlega fyrir hendi. Nú liggja allir þeir þættir fyrir, 100%, og þeir hafa reynst neikvæðir. Ég vildi að sú skoðun ætti sér stað og ég hef sem betur fer í starfi mínu haft betri aðgang til þess að skoða þá kosti en nokkur annar maður íslenskur. Ég hef haft tækifæri til að ræða við nánast alla forustumenn Evrópusambandsins, æðstu menn þar á bæ, í gegnum langa hríð og þekki þess vegna mjög vel til þessara mála. Ég hef ekki breytt um skoðun, taldi þá að það þyrfti að skoða þá kosti sem fyrir hendi væru. Þeir liggja nú fyrir, klárir í mínum huga, þannig að ég tel það ekki skipta máli.

Varðandi nefndina hins vegar tel ég að hún eigi ekki að lúta minni forskrift, heldur eigi að skoða þar alla kosti og ég geri ekki ráð fyrir að aðrir þingflokkar mundu setja sig í þá nefnd nema vegna þess að þar verði allir kostir opnir til skoðunar, í þeirri nefnd.

2003-10-06 15:08:39# 130. lþ. 4.1 fundur 45#B hugsanleg aðild Noregs að ESB# (óundirbúin fsp.), forsrh. [prenta uppsett í dálka] 4. fundur , 130. lþ.

[15:08]

Forsætisráðherra (Davíð Oddsson) :

Herra forseti. Ég geri ráð fyrir því að hitta Bondevik í lok þessa mánaðar á Norðurlandaráðsþingi eins og fleiri menn þannig að ég skal gjarnan stíga inn í hvaða box sem er með honum ef það er allt undir siðlegum formerkjum sem ég geri ráð fyrir. Varðandi hins vegar það að ég teldi öllum spurningum svarað og þess vegna væri Evrópunefndin óþörf --- það sem ég var að reyna að koma frá mér og hef kannski ekki gert nógu skýrt var það að þeim spurningum sem bjuggu mér ofarlega í brjósti fyrir 14--15 árum, og hv. þm. var að vísa til, hefur verið svarað. En það er þannig í lífinu að nýjar spurningar vakna hvern dag þótt öðrum gömlum hafi þegar verið svarað. Þannig er nú lífið og þess vegna er það áhugavert.