Fríverslunarsamningur milli ríkja Fríverslunarsamtaka Evrópu og Póllands

116. löggjafarþing Mál nr. 567 16. apríl 1993 – 7. maí 1993 Sjá á Alþingi.is ↗
3 ræður
3 þingmenn
670 orð
3 flokkar
Alþýðubandalag Alþýðuflokkur Sjálfstæðisflokkur

Ríkisstjórn

Jón Baldvin Hannibalsson
Alþýðuflokkur
1 ræða 329 orð
Björn Bjarnason
Sjálfstæðisflokkur
1 ræða 79 orð

Stjórnarandstaða

Hjörleifur Guttormsson
Alþýðubandalag
1 ræða 262 orð

Tímalína umræðunnar

16. apríl 1993
Jón Baldvin Hannibalsson Alþýðuflokkur flutningsræða
329 orð
Utanríkisráðherra (Jón Baldvin Hannibalsson): Virðulegi forseti. Ég mæli fyrir þáltill. um fullgildingu fríverslunarsamnings milli ríkja Fríverslunarsamtaka Evrópu, EFTA, og lýðveldisins Póllands sem undirritaður var í Genf 10. des. 1992. Samningurinn er að mestu byggður á fríverslunarsamningum milli einstakra EFTA-ríkja og Evrópubandalagsins frá 1972--1973, þ.e. fríverslun með iðnaðarvörur og heimild til verðjöfnunar, í tilviki Íslands álagningu tolla og fjáröflunar eða verðjöfnunar á vörur…

Utanríkisráðherra (Jón Baldvin Hannibalsson): Virðulegi forseti. Ég mæli fyrir þáltill. um fullgildingu fríverslunarsamnings milli ríkja Fríverslunarsamtaka Evrópu, EFTA, og lýðveldisins Póllands sem undirritaður var í Genf 10. des. 1992.

Samningurinn er að mestu byggður á fríverslunarsamningum milli einstakra EFTA-ríkja og Evrópubandalagsins frá 1972--1973, þ.e. fríverslun með iðnaðarvörur og heimild til verðjöfnunar, í tilviki Íslands álagningu tolla og fjáröflunar eða verðjöfnunar á vörur unnar að hluta eða öllu leyti úr landbúnaðarhráefnum. Jafnframt felur svo samningurinn við Pólland í sér að smám saman verði komið á fullri fríverslun með fisk og fiskafurðir milli EFTA-ríkjanna og Póllands og ákveðnum aðlögunartíma, sbr. II. viðauka samningsins.

Pólland mun fella niður innflutningstolla á öllum fiski og fiskafurðum um 10% við gildistöku samningsins. Afgangurinn fellur svo niður á sama aðlögunartíma og gildir fyrir innflutning iðnaðarvara, þ.e. í fimm jöfnun áföngum frá 1. jan. 1995 þannig að full fríverslun verði komin á 31. des. 2001.

Á undanförnum árum hafa helstu útflutningsvörur Íslands til Póllands verið síld og fiskimjöl. Núverandi tollar á þessum vörum eru 15% á síld og 10% á fiskimjöli. Við gildistöku samningsins mun tollur á síld verða 5% og á mjöli 0%. Mjög erfitt ef ekki útilokað væri í framtíðinni að keppa við aðrar þjóðir t.d. Norðmenn um útflutning á þessum vörum ef Ísland gerði ekki þennan fríverslunarsamning. Landbúnaðarvörur eru ekki hluti fríverslunarsamningsins. Einstök EFTA-ríki gerðu þó samhliða samningnum um fríverslun tvíhliða samning um ákveðnar landbúnaðarvörur við Pólland. Í tvíhliða samningi Íslands og Póllands er hins vegar um að ræða vörur sem ekki eru framleiddar hér á landi, einkum ávexti. Svíþjóð hefur staðfest samninginn og austurríska þingið hefur samþykkt hann. Samningurinn er til umfjöllunar í finnska, norska og svissnesku þingunum og búist er við því að Póllandi leggi hann fyrir þingið fljótlega. Í athugasemdum við þáltill. er gerð ítarleg grein fyrir samningum og viðskiptum Íslands við Pólland undanfarin ár og vísast til þess.

Ég leyfi mér, virðulegi forseti, að leggja til að tillögunni verði að lokinni þessari umræðu vísað til síðari umr. og hv. utanrmn.

7. maí 1993
Björn Bjarnason Sjálfstæðisflokkur flutningsræða
79 orð
Frsm. utanrmn. (Björn Bjarnason): Frú forseti. Ég mæli fyrir áliti utanrmn. á þskj. 1127 um till. til þál. um fullgildingu fríverslunarsamnings milli ríkja Fríverslunarsamtaka Evrópu og lýðveldisins Póllands. Nefndin fjallaði um tillöguna og fékk á sinn fund til viðræðna um efni hennar Árna Kolbeinsson, ráðuneytisstjóra í sjútvrn., Sigurgeir Þorgeirsson, aðstoðarmann landbrh., Jóhann Guðmundsson, deildarstjóra í landbrn., og Gunnar Snorra Gunnarsson, skrifstofustjóra í utanrrn. Utanrmn.…

Frsm. utanrmn. (Björn Bjarnason): Frú forseti. Ég mæli fyrir áliti utanrmn. á þskj. 1127 um till. til þál. um fullgildingu fríverslunarsamnings milli ríkja Fríverslunarsamtaka Evrópu og lýðveldisins Póllands.

Nefndin fjallaði um tillöguna og fékk á sinn fund til viðræðna um efni hennar Árna Kolbeinsson, ráðuneytisstjóra í sjútvrn., Sigurgeir Þorgeirsson, aðstoðarmann landbrh., Jóhann Guðmundsson, deildarstjóra í landbrn., og Gunnar Snorra Gunnarsson, skrifstofustjóra í utanrrn.

Utanrmn. mælir einróma með samþykkt tillögunnar en hv. þm. Hjörleifur Guttormsson ritar undir nál. með fyrirvara.

Hjörleifur Guttormsson Alþýðubandalag ræða
262 orð
Hjörleifur Guttormsson: Virðulegur forseti. Fyrirvari minn við þetta mál snertir þá þætti þessa fríverslunarsamnings við Pólland sem varða landbúnaðarsviðið og einnig iðnaðarsviðið. Ég vil að vísu ekki fullyrða að þarna sé um að ræða bein ákvæði sem geta verið skaðleg okkar hagsmunum, en ég tel hins vegar að ekki hafi verið gengið úr skugga um eins og þurft hefði að vera að svo sé ekki og þá hef ég í huga rýmkun á heimildum varðandi unnar landbúnaðarafurðir sem snerta þennan samning þar sem…

Hjörleifur Guttormsson: Virðulegur forseti. Fyrirvari minn við þetta mál snertir þá þætti þessa fríverslunarsamnings við Pólland sem varða landbúnaðarsviðið og einnig iðnaðarsviðið. Ég vil að vísu ekki fullyrða að þarna sé um að ræða bein ákvæði sem geta verið skaðleg okkar hagsmunum, en ég tel hins vegar að ekki hafi verið gengið úr skugga um eins og þurft hefði að vera að svo sé ekki og þá hef ég í huga rýmkun á heimildum varðandi unnar landbúnaðarafurðir sem snerta þennan samning þar sem verið er að feta ekki ósvipaða slóð og í EES-samningnum og þar sem við þurfum sannarlega að gæta okkar. Það lá ekki fyrir utanrmn. nein skrifleg greinargerð frá landbrn. um þetta efni sem ég hefði talið að hefði þurft að fylgja málinu. Það er mjög margt sem hefur komið fram á undanförnum mánuðum að því er varðar óljós atriði, ófrágengin atriði á landbúnaðarsviði, m.a. í tengslum við EES-samninginn, og því kallar það á varfærni í málum sem þessum.

Hitt atriðið sem ég vildi nefna er iðnaðarsviðið, en við eigum mikil samskipti og viðskipti við Pólland á því sviði, ekki síst á sviði skipasmíða og skipaviðgerða og það vantaði inn í málsmeðferðina að mér þótti af hálfu okkar í utanrmn. að fá skilmerkileg svör frá hagsmunaaðilum í málm- og skipasmíðaiðnaði að því er þetta varðar, en við skulum vona að samningurinn veiti svigrúm til eðlilegra aðgerða ef að mati íslenskra stjórnvalda æskilegt er og eðlilegt að grípa til þeirra og því hef ég ekki sett mig á móti málinu, en geri þessa fyrirvara sem ég hef hér gert grein fyrir.