Evrópska mannfjöldaráðstefnan 1993

116. löggjafarþing Mál nr. 135 12. nóvember 1992 Sjá á Alþingi.is ↗
3 ræður
2 þingmenn
841 orð
2 flokkar
Samtök um kvennalista Sjálfstæðisflokkur

Ríkisstjórn

Davíð Oddsson
Sjálfstæðisflokkur
1 ræða 314 orð

Stjórnarandstaða

Kristín Ástgeirsdóttir
Samtök um kvennalista
2 ræður 527 orð

Tímalína umræðunnar

12. nóvember 1992
Kristín Ástgeirsdóttir Samtök um kvennalista flutningsræða
280 orð
Fyrirspyrjandi (Kristín Ástgeirsdóttir): Virðulegi forseti. Mikil fjölgun mannkynsins er eitt stærsta vandamál sem við glímum við á jörðinni. Sameinuðu þjóðirnar og ýmsar aðrar alþjóðastofnanir hafa beint sjónum að þessum vanda og reynt margt til að draga úr fólksfjölgun án verulegs árangurs. Það er mikilvægt að átta sig á mannfjöldaþróun, hvar hún er mest, hvernig fólki gengur að brauðfæða sig, hvar sjúkdómar herja o.s.frv., en þó ekki síst að fylgjast með flutningum fólks milli landa og…

Fyrirspyrjandi (Kristín Ástgeirsdóttir): Virðulegi forseti. Mikil fjölgun mannkynsins er eitt stærsta vandamál sem við glímum við á jörðinni. Sameinuðu þjóðirnar og ýmsar aðrar alþjóðastofnanir hafa beint sjónum að þessum vanda og reynt margt til að draga úr fólksfjölgun án verulegs árangurs. Það er mikilvægt að átta sig á mannfjöldaþróun, hvar hún er mest, hvernig fólki gengur að brauðfæða sig, hvar sjúkdómar herja o.s.frv., en þó ekki síst að fylgjast með flutningum fólks milli landa og heimsálfa. Evrópubúar hafa nokkurn veginn náð tökum á fólksfjölgun í álfunni þótt þar þrjóskist ýmsir við, svo sem kaþólska kirkjan, sem að mínum dómi sýnir mikið ábyrgðarleysi gagnvart þessu vandamáli mannkynsins.

Þó er mikill þrýstingur á lönd Evrópu frá fólki sem vill fá að flytjast frá fátækt eða örbirgð yfir í velsældina sem það telur vera í Evrópu. Ólöglegur flutningur fólks, þrælahald af ýmsu tagi og flóttamannastraumur er vaxandi vandamál í Evrópu og því veitir þjóðum álfunnar ekki af að fylgjast með því sem gerist innan hennar.

Dagana 23.--26. mars nk. verður haldin mannfjöldaráðstefna Evrópu í Genf í Sviss sem m.a. er undirbúningur fyrir ráðstefnu Sameinuðu þjóðanna um mannfjölgun og þróun sem haldin verður árið 1994. Ráðstefnan í Genf var kynnt á fundi nefndar þeirrar sem fjallar um málefni flóttamanna, mannfjöldaþróun og lýðfræði hjá Evrópuráðinu, en í þeirri nefnd á ég sæti. Eftir þá kynningu aflaði ég mér gagna um þessa ráðstefnu en þau vöktu hjá mér þær spurningar hvernig að þessum málum hefði verið unnið hér á landi. Því vil ég spyrja hæstv. forsrh.:

,,1. Hvernig hefur undirbúningi íslenskra stjórnvalda verið háttað fyrir evrópsku mannfjöldaráðstefnuna sem haldin verður í Genf 23.--26. mars 1993?

  1. Hvernig hyggjast stjórnvöld haga þátttöku Íslendinga í evrópsku mannafjöldaráðstefnunni 1993?``
Davíð Oddsson Sjálfstæðisflokkur svar
314 orð
Forsætisráðherra (Davíð Oddsson) : Virðulegi forseti. Hv. 18. þm. Reykv. spyr:   ,,1. Hvernig hefur undirbúningi íslenskra stjórnvalda verið háttað fyrir evrópsku mannfjöldaráðstefnuna sem haldin verður í Genf 23.--25. mars 1993? 2. Hvernig hyggjast stjórnvöld haga þátttöku Íslendinga í evrópsku mannfjöldaráðstefnunni 1993?`` Mannfjöldaráðstefna Evrópu sem verður haldin í mars 1993 er nú í fyrsta sinn haldin sameiginlega af Genfarskrifstofu Sameinuðu þjóðanna, Evrópuráðinu og…

Forsætisráðherra (Davíð Oddsson) : Virðulegi forseti. Hv. 18. þm. Reykv. spyr:   ,,1. Hvernig hefur undirbúningi íslenskra stjórnvalda verið háttað fyrir evrópsku mannfjöldaráðstefnuna sem haldin verður í Genf 23.--25. mars 1993? 2. Hvernig hyggjast stjórnvöld haga þátttöku Íslendinga í evrópsku mannfjöldaráðstefnunni 1993?`` Mannfjöldaráðstefna Evrópu sem verður haldin í mars 1993 er nú í fyrsta sinn haldin sameiginlega af Genfarskrifstofu Sameinuðu þjóðanna, Evrópuráðinu og Evrópubandalaginu. Sameinuðu þjóðirnar hafa frá upphafi unnið að mannfjöldamálum og halda á áratugs fresti heimsþing um mannfjöldaþróun og mannfjöldapólitík. Undanfari hvers slíks heimsþings eru svæðisbundnar ráðstefnur, svo sem sérstök Evrópuráðstefna. Á ráðstefnuna koma sendinefndir ríkisstjórna og er óskað eftir því að fyrir sendinefnd fari sem hæst settur embættismaður og helst ráðherra. Ráðstefnan samþykkir stefnumarkandi ályktanir. Evrópuráðið stendur fyrir umfjöllun um mannfjöldamál og starfar mannfjöldanefnd Evrópu á þess vegum. Þar er einn fulltrúi hvers aðildarlands en þeir eru þar sem einstaklingar og hlutverk nefndarinnar er fyrst og fremst fræðilegs eðlis. Hún er Evrópuráðinu til ráðgjafar um mannfjöldamál og stýrir verkefnum sem valdir fræðimenn eru fengnir til að vinna. Nefndin stendur fyrir námsstefnum og ráðstefnum um mannfjöldamál Evrópu. Þegar ljóst var að mannfjöldaráðstefnur beggja stofnanna voru fyrirhugaðar á árinu 1993 samdist um að sameinast um eina ráðstefnu ásamt Evrópubandalaginu. Utanrrn. hefur annast þann takmarkaða undirbúning fyrir ráðstefnuna sem fram hefur farið. Ráðuneytið sendi Hagstofunni spurningalista frá Sameinuðu þjóðunum um álit á stefnu yfirvalda varðandi mannfjöldaþróun. Eins og áður annast Hagstofan upplýsingasöfnun fyrir Sameinuðu þjóðirnar og hefur sent þann hluta listans sem varðar fæðingar og manndauða til landlæknisembættisins og þann sem varðar dreifingu byggðar og fólksflutninga innan lands og milli

landa til Byggðastofnunar. Boð um að senda sendinefnd til fundarins var sent út í sumar af hálfu forstöðu stofnunarinnar. Boð þetta er til athugunar í utanrrn. en ekki hefur verið ákveðið enn sem komið er hvernig þátttöku Íslands verður þar háttað. Fyrir liggur þó að starfsmaður Hagstofunnar mun sækja ráðstefnuna sem nefndarmaður í mannfjöldanefnd Evrópuráðsins.

Kristín Ástgeirsdóttir Samtök um kvennalista ræða
247 orð
Fyrirspyrjandi (Kristín Ástgeirsdóttir): Virðulegi forseti. Ég þakka hæstv forsrh. fyrir svörin. Ég beindi þessari spurningu til hans vegna þess að ég taldi að það væri Hagstofan sem ynni að undirbúningi þessarar ráðstefnu og vissi reyndar að starfsmaður þaðan hafði setið undirbúningsfundi. Önnur ástæða fyrir því að ég lagði þessar spurningar fram var sú að á fundinum hjá Evrópuráðinu sem ég nefndi áðan þar sem þessi ráðstefna var kynnt kom fram að þess væri ekki síst óskað að fulltrúar…

Fyrirspyrjandi (Kristín Ástgeirsdóttir): Virðulegi forseti. Ég þakka hæstv forsrh. fyrir svörin. Ég beindi þessari spurningu til hans vegna þess að ég taldi að það væri Hagstofan sem ynni að undirbúningi þessarar ráðstefnu og vissi reyndar að starfsmaður þaðan hafði setið undirbúningsfundi.

Önnur ástæða fyrir því að ég lagði þessar spurningar fram var sú að á fundinum hjá Evrópuráðinu sem ég nefndi áðan þar sem þessi ráðstefna var kynnt kom fram að þess væri ekki síst óskað að fulltrúar þjóðþinga kæmu á þessa ráðstefnu. Óskað var eftir pólitískum fulltrúum vegna þess að það eru þeir sem taka ýmsar þær ákvarðanir sem valdið geta miklu um fólksfjöldaþróun og hversu miklir fólksflutningar eru leyfðir milli landa. Þess var líka sérstaklega óskað að konur ættu fulltrúa á þessari ráðstefnu, enda er málið þeim mjög skylt, svo sem körlum líka, en þetta kom fram. Konur og þingmenn eru sérstaklega velkomin á þessa ráðstefnu. Ég vil koma þessu á framfæri og tel að hér sé um mjög merka ráðstefnu að ræða. Þó að við Íslendingar eigum ekki við nein teljandi vandamál að stríða í þessum efnum, hvorki hvað varðar fólksfjölgun eða fækkun eða að hingað sé mikill straumur flóttamanna, þá er mjög brýnt að við fylgjumst mjög vel með þessum málum vegna þess að það er mjög mikið að gerast í þessum málefnum. Eins og ég nefndi fyrr í ræðu minni er mikill þrýstingur á Evrópulöndin frá öðrum heimsálfum og við þurfum að marka okkur stefnu í þeim málum eins og aðrar þjóðir.